E rëndësishme për pronarët/ Shtëpitë e ndërtuara para ’91 regjistrohen online, ja si aplikohet
Pronarët e shtëpive të ndërtuara para vitit 1991 mund të regjistrojnë përmes portalit e-Albania vendimin për kalimin në pronësi të banesës, oborrit në përdorim apo truallit funksional, duke u pajisur me dokumentacionin e plotë të pronësisë.
Agjencia Shtetërore e Kadastrës ka shpjeguar procedurën që duhet të ndjekin qytetarët, e cila kryhet tërësisht online, pa qenë e nevojshme paraqitja pranë sporteleve. Më poshtë gjeni, hap pas hapi, mënyrën e aplikimit dhe dokumentet që përfitohen në fund të procesit.
Pas përfundimit të procedurës, do të pajiseni me dokumentacionin e plotë të pronësisë së pasurisë suaj.
Hapi 1: Hyni në e-Albania
Fillimisht hyni në llogarinë tuaj në portalin e-Albania me kredencialet personale.
Hapi 2: Zgjidhni shërbimin e duhur
Në fushën e kërkimit gjeni shërbimin:
“Aplikim për regjistrimin e kalimit të pronësisë me anë të ligjit, me vendim të gjykatës, apo të një akti administrativ”.
Klikoni butonin “Përdor” për të nisur aplikimin.
Hapi 3: Krijoni një aplikim të ri
Pasi të hapet shërbimi, krijoni një aplikim të ri dhe plotësoni të gjitha të dhënat që kërkon sistemi.
Hapi 4: Shtoni nënshërbimin
Gjatë aplikimit duhet të përzgjidhni edhe nënshërbimin:
“Regjistrim i kalimit të pronësisë me anë të aktit administrativ të lëshuar nga ASHK”.
Ky është shërbimi që mundëson regjistrimin e aktit të kalimit në pronësi.
Hapi 5: Çfarë përfitoni automatikisht?
Sipas Agjencisë Shtetërore të Kadastrës, bashkë me këtë aplikim shtohen automatikisht edhe tre shërbime të tjera:
Lëshimi i certifikatës së pronësisë;
Kopja e kartelës së pasurisë së paluajtshme;
Kopja e fragmentit të hartës kadastrale.
Këto dokumente do të jenë pjesë e procesit pa pasur nevojë të bëni aplikime të veçanta.
Hapi 6: Dërgoni aplikimin dhe kryeni pagesën
Pasi të keni plotësuar të gjitha të dhënat, dërgoni aplikimin në mënyrë elektronike.
Më pas mund të shkarkoni mandatin e pagesës dhe ta shlyeni:
online;
pranë Postës Shqiptare;
ose në çdo bankë të nivelit të dytë.
Çfarë duhet të dini para se të aplikoni?
Para se të nisni procedurën, ASHK këshillon qytetarët të informohen për dokumentacionin që kërkohet për aplikimin. Ky informacion gjendet në faqen zyrtare të institucionit, te rubrika “Shërbime”.
Me përfundimin e procedurës, regjistrohet përfundimisht akti administrativ për kalimin në pronësi dhe përfituesi pajiset me dokumentacionin kadastral të pasurisë.
