Serbi/ Rreth 82,000 litra naftë janë derdhur në Danub, rrezik për 10 vendet e Evropës
Një sasi prej rreth 82,000 litrash eurodizel është derdhur në lumin Danub gjatë një operacioni të transferimit të karburantit në një maune, rreth 20 kilometra nga kryeqyteti serb, duke shkaktuar një alarm për ndotje serioze të ujërave.
Ngjarja ka ndodhur më 21 prill, në rafinerinë e Pançevës, një qytet industrial në rajonin e Vojvodinës.
Sipas raportimeve të para nga autoritetet lokale dhe Instituti i Shëndetit Publik në Pançevë, derdhja e naftës ndodhi gjatë një operacioni ngarkimi të kryer nga kompania private ‘Naftahem’. Sasia e madhe e karburantit e derdhur është aktualisht e përqendruar brenda një barriere mbrojtëse që rrethon mjetin lundrues, por autoritetet shprehen të shqetësuara për ndikimet potenciale në rrjedhën e lumit dhe biodiversitetin lokal.
Sekretariati për Mbrojtjen e Mjedisit i Vojvodinës konfirmoi se shkaku më i mundshëm i incidentit është pakujdesia njerëzore, duke theksuar se lënda djegëse mund të kishte shkaktuar dëme edhe më të mëdha nëse nuk do të ishte izoluar menjëherë.
Janë marrë mostra në shtatë lokacione përgjatë lumit dhe analizat po vazhdojnë për të përcaktuar shkallën e ndotjes,” deklaroi për agjencinë AFP, Dr. Liliana Laziç, drejtoreshë e Institutit të Shëndetit Publik të Pançevës.
Ngjarja ka rikthyer vëmendjen ndaj problemeve kronike të menaxhimit të mbetjeve dhe ndotjes së ujërave në Serbi, ku, sipas të dhënave zyrtare, më pak se 15% e ujërave të zeza trajtohen në mënyrë të duhur, ndërsa pjesa tjetër shkarkohet në mënyrë të pakontrolluar në lumenj dhe përrenj.
Prokuroria serbe ka hapur një hetim zyrtar për të përcaktuar përgjegjësit e incidentit dhe për të vlerësuar pasojat mjedisore. Organizatat mjedisore në vend dhe rajon kanë kërkuar transparencë maksimale dhe masa të menjëhershme për të parandaluar përhapjen e ndotjes.
Lumi Danub, një nga rrjedhat më të rëndësishme ujore të Evropës, kalon nëpër dhjetë vende dhe është burim jetik për miliona njerëz. Çdo ndotje e tij përbën rrezik të drejtpërdrejtë për shëndetin publik, biodiversitetin dhe ekosistemet e lidhura me të.
Hetimet vazhdojnë, ndërsa pritet që autoritetet serbe të japin informacion të detajuar mbi masat që do të ndërmerren për të minimizuar dëmet dhe për të shmangur incidente të ngjashme në të ardhmen. Syri.net-iefimerida.
