Përplasja me Ramën dhe largimi nga Per’puthen/ Arjan Konomi publikon audion e bisedës me drejtuesen: Mbylle buçen!
Përplasja e Arjan Konomit me familjen e kryeministrit Edi Rama në Vuno është rikthyer në qendër të vëmendjes pas deklaratave të gazetarit për largimin e tij nga Top Channel dhe një audioje që ai ka publikuar në rrjetet sociale, e cila u fshi nga hackerat dhe për të cilën Konomi reagoi sërish.
Konomi pretendon se pas incidentit të 20 gushtit dhe qëndrimeve të tij publike ndaj Edi dhe Linda Ramës, rikthimi i tij si opinionist në “Për’puthen” nuk u realizua. Sipas tij, vendimi iu komunikua nga zv.CEO e Top Channel, Steliana Selmani, gjatë një telefonate.
Incidenti në Vuno nisi pasi Konomi kritikoi parkimin e automjeteve të eskortës së kryeministrit. Sipas versionit të gazetarit, ai kishte filmuar situatën dhe më pas pati një debat me Edi dhe Linda Ramën. Konomi pretendoi gjithashtu se truprojat i morën telefonin dhe se më pas u shoqërua në Komisariatin e Himarës.
Një ditë më vonë, Edi Rama publikoi një video të incidentit, duke dhënë versionin e tij për atë që kishte ndodhur. Kryeministri pretendoi se Konomi kishte bullizuar bashkëshorten e tij dhe djalin e tyre, ndërsa pamjet, sipas Ramës, tregonin një situatë ndryshe nga ajo e përshkruar më herët nga gazetari.
Pas kësaj përplasjeje, Konomi deklaroi publikisht se ishte kontaktuar më herët nga Top Channel për t’u rikthyer në “Për’puthen”. Ai pretendon se kishte pranuar rolin e opinionistit, edhe pse, sipas tij, pagesa do të ishte rreth gjysma e asaj që kishte marrë më parë.
Por, sipas versionit të Konomit, situata ndryshoi pas përplasjes në Vuno.
Gazetari ka deklaruar se gjatë telefonatës me Steliana Selmanin iu komunikua se nuk do të ishte më pjesë e programit. Ai pretendon se një nga arsyet e përmendura ishte mënyra se si kishte folur për Linda Ramën, ndërsa më tej thotë se iu tha se, si imazh i Top Channel, nuk mund të shprehte bindje politike apo të merrte pjesë në protesta.
“Je imazhi i Top Channel-it dhe nuk mund të shprehësh bindje dhe gjëra politike. Nuk mund të marrësh pjesë në protesta”, ka cituar Konomi nga biseda.
Por historia mori një tjetër kthesë kur ai publikoi një pjesë audio të komunikimit.
Në materialin e publikuar nga Konomi dëgjohet një zë që ai e identifikon atë si të Steliana Selmanit. Në audio diskutohet edhe shprehja “mbylle buçen”, për të cilën Konomi kishte pretenduar se ishte përdorur gjatë komunikimit me të. Sipas shpjegimit që dëgjohet në material, shprehja ishte thënë në një kontekst “konfidencial, miqësor dhe humoristik”, dhe jo me kuptimin që Konomi i kishte dhënë.
“Fjalën ‘mbyll buçën’ nuk e thashë fare në kontekstin që do ta marrësh ti. Ta kam thënë në kontekst konfidencial, miqësor dhe humoristik”, dëgjohet në audion e publikuar nga gazetari.
Konomi, nga ana tjetër, e ka interpretuar komunikimin si të lidhur me largimin e tij nga “Për’puthen” dhe me qëndrimet e tij publike pas përplasjes në Vuno.
Deri tani, këto mbeten pretendime të bëra publikisht nga Konomi. Nuk ka një deklaratë publike të Top Channel që të konfirmojë se largimi i tij nga “Për’puthen” ka ardhur për shkak të qëndrimeve politike ndaj qeverisë. Po ashtu, nuk është bërë publik ndonjë rregull i Top Channel që ndalon figurat e ekranit të marrin pjesë në protesta apo të shprehin bindjet e tyre politike jashtë programit.
Vetë Konomi e ka çuar debatin më tej, duke ngritur pyetjen nëse qëndrimet politike të një personazhi televiziv mund të ndikojnë në marrëdhënien e tij me një media./Pamfleti
