Diabeti është një sëmundje kronike që ndikon në mënyrën se si trupi përpunon sheqerin në gjak, por tek gratë shpeshherë shfaqet në mënyra të ndryshme krahasuar me burrat. Këto dallime lidhen ngushtë me ndryshimet hormonale dhe funksionimin e sistemit riprodhues femëror.
Një nga treguesit e hershëm që mund të sinjalizojë praninë e diabetit tek gratë është infeksioni i traktit urinar. Nivelet e larta të sheqerit në gjak mund të dobësojnë sistemin imunitar dhe të ndikojnë në funksionimin e fshikëzës së urinës, duke e bërë më të vështirë zbrazjen e saj të plotë. Kjo krijon kushte për shfaqjen e infeksioneve, të cilat shoqërohen me djegie gjatë urinimit dhe nevojë të vazhdueshme për të urinuar.
Një tjetër faktor shqetësues është sindroma e vezoreve policistike (PCOS), e cila ndikon në prodhimin e tepërt të insulinës. Kjo gjendje e bën trupin më të ndjeshëm ndaj zhvillimit të diabetit të tipit 2, sidomos pas moshës 40 vjeç.
Simptoma të zakonshme që shfaqen si tek burrat ashtu edhe tek gratë përfshijnë: urinim të shpeshtë, etje dhe uri të vazhdueshme, lodhje, shikim të paqartë, mpirje në duar ose këmbë dhe humbje ekstreme të peshës. Këto janë shenja që nuk duhen neglizhuar, veçanërisht nëse keni histori familjare me diabet ose jeni diagnostikuar më parë me prediabet.
Një formë tjetër e diabetit që ndikon specifikisht gratë është diabeti gestacional, i cili shfaqet gjatë shtatzënisë, zakonisht në tremujorin e dytë. Testimi bëhet midis javës së 24 dhe 28 të shtatzënisë dhe në shumicën e rasteve menaxhohet me dietë dhe aktivitet fizik, edhe pse ndonjëherë nevojitet trajtim me insulinë.
Edhe pas lindjes, gratë që kanë pasur diabet gestacional mbeten në rrezik për të zhvilluar diabet të tipit 2 më vonë gjatë jetës, ndaj është e rëndësishme të vazhdojnë kontrollin e rregullt të sheqerit në gjak.
Nëse dyshoni se mund të keni diabet, është e domosdoshme të konsultoheni me mjekun për analiza dhe trajtim të përshtatshëm. Diagnoza e hershme dhe kujdesi i vazhdueshëm janë çelësi për një jetë të shëndetshme.
