“Mora Fjalë” shkon në Hollywood/ Kënga ikonike e Shkurte Fejzës, bëhet pjesë e filmit amerikan?

Kënga ikonike “Mora Fjalë” e Shkurte Fejzës pritet të dëgjohet edhe në një produksion të ri amerikan që trajton një prej kapitujve më të dhimbshëm të historisë së Kosovës.

Bëhet fjalë për filmin “The Journalist Mission”, një projekt që fokusohet në ngjarjet e Luftës së Kosovës dhe që tashmë ka tërhequr vëmendjen edhe për mënyrën se si ka përfshirë muzikën shqiptare në rrëfimin e tij.

Sipas një publikimi të bërë në rrjetet sociale, kënga e Shkurte Fejzës nuk është thjesht pjesë e kolonës zanore, por ka pasur një rol të veçantë në krijimin e vetë projektit.

I gjithë skenari i ‘The Journalist Mission’ është shkruar me melodinë e ‘Mora Fjal’ nga e madhja Shkurte Fejza -thuhet në publikim.

“Mora Fjalë” është një prej këngëve më të njohura të repertorit të Shkurte Fejzës dhe ndër vite është shndërruar në një këngë me ngarkesë të fortë emocionale për shqiptarët.

Përfshirja e saj në një film amerikan që trajton Luftën e Kosovës i jep këngës një tjetër dimension, duke e çuar historinë dhe emocionin që ajo përcjell drejt një audience ndërkombëtare.

Në një kohë kur produksionet ndërkombëtare po i kushtojnë gjithnjë e më shumë vëmendje historive nga Ballkani, muzika shqiptare po gjen një tjetër mënyrë për të treguar historinë e Kosovës përtej kufijve.

Nëse projekti realizohet sipas planit, “The Journalist Mission” do të bëhet një tjetër rast ku arti shqiptar shërben si urë mes kujtesës historike të Kosovës dhe publikut ndërkombëtar.