Shpalli emrat e gabuar, gafa e Arbana Osmanit ndryshon rrjedhën e lojës në “Ferma VIP”!
Mbrëmja e djeshme në spektaklin “Ferma VIP” u shoqërua me debate dhe polemika, pas një situate të pazakontë që detyroi produksionin të ndërhyjë dhe të rishikojë një nga vendimet e marra gjatë transmetimit live.
Gjithçka nisi gjatë procesit të përzgjedhjes së konkurrentëve që do të shkonin në televotim për një vend në finale. Sipas formulës së vendosur nga produksioni, një provë simbolike me një dele do të përcaktonte dy fermerët që do të përballeshin kokë më kokë në televotim.
Pamjet e transmetuara treguan se kafsha u afrua fillimisht pranë Bujakës dhe më pas te Visi. Megjithatë, gjatë komunikimit të drejtpërdrejtë me fermerët, moderatorja Arbana Osmani njoftoi se dy emrat e përzgjedhur ishin Visi dhe Iliri.
Deklarata shkaktoi menjëherë reagime dhe kundërshtime nga banorët, të cilët vunë në dukje se ajo që ishte parë në ekran nuk përputhej me rezultatin e shpallur. Sipas tyre, delja kishte kaluar fillimisht pranë Bujakës, ndërsa në një moment ishte afruar edhe te Soni.
Debati zgjati për disa minuta, duke detyruar produksionin të ndalonte përkohësisht rrjedhën normale të spektaklit për të verifikuar pamjet e regjistruara.
Pas rishikimit të videos në kohë reale, u konstatua se kishte pasur një pasaktësi në interpretimin e provës dhe produksioni vendosi të ndryshojë formulën e televotimit. Në vend të dy konkurrentëve, në televotim u dërguan tre fermerë: Bujaka, Visi dhe Iliri.
Ngjarja u komentua gjerësisht edhe në rrjetet sociale, ku ndjekësit e formatit diskutuan mbi mënyrën se si u menaxhua situata dhe ndërhyrjen e produksionit për të korrigjuar vendimin fillestar.
