“Më erdhi një goditje dhe rashë në tokë”, 28-vjeçari rrëfen momentin kur u plagos gjatë protestës

Erjon Vishkulli, 28-vjeçari që mbeti i plagosur rëndë në sy gjatë protestës në Tiranë, ka rrëfyer për herë të parë momentet kur u godit dhe përfundoi në spital.
Në një intervistë për “TCH”, i riu ka treguar se në momentin e incidentit ndodhej rreth 30 metra larg efektivëve të policisë dhe po përgatitej të largohej nga protesta.
Sipas tij, gjithçka ndodhi papritur, teksa po takonte një mik gazetar. Vishkulli tregon se ndjeu një goditje të fortë, arriti të bënte vetëm disa hapa dhe më pas u rrëzua në tokë.
“Shkova të takoja shokët dhe do të ikja. Kisha hequr maskën e oksigjenit dhe në atë moment takova një shok gazetar. I kisha diku 30 metra larg policët, pa asnjë reagim, pa asgjë. Vetëm kur më vjen një goditje, eca rreth dy metra dhe rashë në tokë”, tha Vishkulli.

28-vjeçari ka treguar se pas goditjes ishte vetëm pjesërisht i vetëdijshëm dhe se nuk mban mend shumë nga momentet që pasuan. Ai kujton vetëm se një shok e ndihmoi dhe e transportoi me makinë për të marrë ndihmë mjekësore.
“Isha pak i vetëdijshëm, ndërkohë që një shok më shoqëroi me makinë. Kaq mbaj mend pastaj”, u shpreh Vishkulli.
Ndërkohë, i riu thotë se plumbi i gomës ndodhet ende në syrin e tij të majtë dhe se vazhdon të përjetojë dhimbje të forta. Ai shprehet se nuk e di ende sa i madh është rreziku për shikimin.
“Vazhdoj ta kem ende plumbin e gomës në sy. Nuk e di tani të them se sa i lartë është rreziku, por e lehtë nuk është, sepse kam shumë dhimbje”, deklaroi ai.
Bëhet me dije se, pas kontakteve me mjekët, stafin e spitalit dhe familjarët e të riut, është siguruar transporti i tij drejt një spitali në Romë, ku pritet të marrë trajtim më të specializuar. Nisja është parashikuar për pasditen e sotme.
Pavarësisht gjendjes shëndetësore dhe pasigurisë për dëmtimin në sy, Vishkulli e mbylli intervistën me fjalët “Vetëm fitore”. I pyetur se çfarë nënkuptonte me këtë shprehje, 28-vjeçari u përgjigj: “Shqipëria është e jona”.
Ndërkohë, autoritetet po vijojnë hetimet për të zbardhur rrethanat e plagosjes së të riut gjatë protestës dhe për të përcaktuar përgjegjësitë për incidentin.