Rusia është detyruar të përdorë armë të vjetra naziste në luftën e saj kundër Ukrainës, pasi Kremlini është i detyruar të boshatisë muzetë për të rimbushur dhe riarmatosur makinën e tij ushtarake shkatërruese.
Njësia e zbulimit ukrainas “Tur” pretendoi se ka zbuluar detonatorë nazistë brenda një depoje municionesh ruse, duke publikuar fotografi të pajisjeve në formë koni me stemën e shqiponjës Reichsadler dhe simbolin e svastikës, të stampuara me vitin 1934.
“Armët naziste po përdoren ende për të vrarë njerëz,” shkroi njësia në një postim në Telegram. “Regjimet e Hitlerit dhe Stalinit nuk ekzistojnë më, por regjimi i Putinit i ka zëvendësuar ata; emrat ndryshojnë, por thelbi mbetet i njëjtë.”
“Autoritetet ruse ushqejnë popullin e tyre me mitin e luftës kundër fashizmit, ndërsa në realitet vetë ata janë shtet fashist,” shtoi njësia, duke iu referuar pretendimit të rremë të Kremlinit se po lufton nazizmin në Ukrainë.
Ky zbulim shërbeu si një kujtesë e historisë së errët të Rusisë në fillim të Luftës së Dytë Botërore, kur udhëheqësi sovjetik Josif Stalin bëri një marrëveshje me Gjermaninë naziste.
“Me 17 shtator 1939, Bashkimi Sovjetik sulmoi pabesisht Poloninë, e cila tashmë ishte e dobësuar rëndë nga luftimet me Wehrmacht-in,” shkroi njësia, duke iu referuar forcave të armatosura naziste. “Ky nuk është i vetmi rast bashkëpunimi mes dy regjimeve totalitare. “Në gusht 1939, BRSS-ja dhe Gjermania nënshkruan një marrëveshje tregtare, e cila u realizua në shkurt 1940. Nëpërmjet këtyre marrëveshjeve Bashkimi Sovjetik mori pajisje ushtarake, makineri, teknologji dhe lëndë të para, përfshirë detonatorë predhash të shënuara me svastikë,” shtoi ajo.
Njësia beson se detonatorët nazistë të zbuluar janë mbetje nga ajo kohë, të “ruajtura në depot ruse,” shkroi në Telegram.
Sipas majorit Oleh Shyriaiev, komandant i Regjimentit të 225-të të Veçantë të Sulmit, nuk është e pazakontë që Rusia të mbështetet te teknologji dhe municione të vjetruara nga luftërat e hershme.
“Kemi parë shumë herë që Rusia ka përdorur pajisje nga koha e Luftës së Dytë Botërore,” i tha ai The Post të mërkurën.
“Kjo tregon se Rusia ka probleme, një sasi e madhe municionesh është përdorur sepse kjo luftë po vazhdon tashmë për gati katër vjet. Dhe çdo lloj rezerve që ka pasur Rusia, tashmë po shteron.”
Vetë Shyriaiev ka parë trupa ruse duke përdorur pushkë Mosin–Nagant, të zhvilluara në fund të viteve 1800, të marra nga muzetë ushtarakë rusë për t’u përdorur në fushëbetejat moderne të Ukrainës.
“Pushka Mosin u zhvillua në fund të shekullit XIX, u përdor në Luftën e Parë dhe të Dytë Botërore dhe më pas u zëvendësua me diçka të quajtur SKS,” tha ai.
“Vetëm pas saj erdhi AK-47, kështu që Mosin është dy gjenerata më e vjetër se AK-ja, e cila vetë nuk është ndonjë armë veçanërisht moderne.”
I dërguari special presidencial amerikan Keith Kellogg foli për këtë fenomen gjatë një paneli në konferencën Yalta European Strategy në Kiev të hënën.
“Rusia po nxjerr tanke nga magazinat, nga muzetë, për t’i vendosur në vijën e frontit,” tha ai, duke përshkruar se si Moska “po humbet” luftën. “Ata nuk mund të veprojnë me lëvizje të mëdha sepse ukrainasit do t’i shkatërrojnë. Dhe ukrainasit po luftojnë me trimëri atje.”
Moskës i është dashur gjithashtu të ripërdorë armë detare të Luftës së Dytë Botërore të montuara mbi rimorkio të blinduara lehtë për luftën atje dhe të përpiqet të modernizojë mjetet e hershme të këmbësorisë të marra nga depot, ndërsa përpiqet të mbajë luftën në Ukrainë përballë stoqeve gjithnjë e më të pakta, tha Shyriaiev.
“Ne dimë gjithashtu dhe që është konfirmuar nga inteligjenca, që Koreja e Veriut ka furnizuar Rusinë me municione pikërisht për këtë arsye, sepse kanë mungesë municionesh,” shtoi komandanti. / New York Post – Syri.net
