Pacolli mohon presionet për aeroportin dhe e quan investigimin e Kapitalit të shtrëmbëruar
Biznesmeni kosovar Behgjet Pacolli ka reaguar pas një investigimi të Kapitalit për sherrin mbi pronësinë e Aeroportit të Vlorës. Përmes një reagimi në rrjetet sociale zoti Pacolli e ka quajtur artikullin të padrejtë dhe të shtrëmbëruar.
“Është e padrejtë të krijohen histori me insinuata. Artikulli i gazetës Kapitali është po aq i shtrembëruar sa edhe i padrejtë. Unë, së bashku me drejtorin e kompanisë Mabco, koncesionare shumicë e Aeroportit të Vlorës, kemi qenë në Kryeministri thjesht për një vizitë kortezie, ku informuam për ecurinë e punimeve në aeroportin e Vlorës.
Nuk është aspak e vërtetë, as korrekte, të thuhet se ka pasur ndonjë presion apo kërkesë për t’u përfshirë qeveria, ashtu siç raportojnë disa media. Në fakt, duke qenë se aeroporti tashmë po hyn në një fazë të re zhvillimi profesional, Mabco ka nisur procesin e riorganizimit të brendshëm, që lidhet vetëm me menaxhimin normal,” shkruan Pacolli në profilin e tij në facebook.
Reagimi i pare i zotit Pacolli
Ky ishte reagimi i parë i zotit Pacolli. Ndërsa pak minuta më vonë ai shtoi edhe një reagim të dytë ku sqaronte se pse kompania mëmë në Zvicër kishte marrë vendim për të kufizuar shitjen e kuotave të koncesionit, që sipas tij është procedurë rutinë e lidhur me garancinë e kredive të marrë në banka.
“Duke marrë shkas nga leximi më i thellë i një shkrim në media, dua të konfirmoj që puna për përfundimin e aeroportit të Vlorës po ecën përpara me sukses dhe me mbështetjen e plotë të qeverisë shqiptare! Ne mezi presim që ta përfundojmë aeroportin në afat për ti dhënë Shqipërisë dhe bregdetit të saj të bukur dhe një destinacion tjetër. Vendimet e aksionerit te VIA nuk janë asgjë tjetër përveçse procedura rutinë që kanë të bëjnë me procese normale qe kanë lidhje me garancine ndaj institucioneve financiare për mos transferimin e kuotave sa kohe qe kreditë e marra apo që do merren në lidhje me zhvillimin e aeroportit nuk janë shlyer,” e mbyll reagimin e tij zoti Pacolli.
Reagimi i dyte i zotit Pacolli
Kapitali e kontaktoi zoti Pacolli përpara se ta publikonte shkrimin dhe e pyeti se pse kompania mëmë kishte marrë vendim për të kufizuar një transferim të mundshëm të koncesionit. Por zoti Pacolli nuk u përgjigj, që Kapitali ta pasqyronte versionin e tij në artikull.
Megjithatë në respekt të profesionalizmit, Kapitali po e publikon të plotë reagimin e zotot Pacolli duke e mirëkuptuar plotësisht atë. Ashtu siç mirëkupton dy reagimet e tij në facebook, të cilat nga nxitimi nuk i përmblodhi dot në një. Ajo që nuk kupton dot është se pse duhej vendim i aksionarit për kufizim kuotash, kur ato janë sakaq me barrë në kontratën e kredisë që aksionerët kanë lidhur me BKT.
Megjithatë zoti Pacolli ka “harruar” të sqarojë edhe një detaj të vogël në reagim. Cfarë do të thotë fjalia; Kufizimin e çdo transferimi pronesie (te kaluar,…) dhe regjistrimit të tyre në QKB?
Por këtë do t’ia lëmë kohës. Ndërkohë Kapitali nuk e tërheq investigimin e tij sepse informacioni që kemi publikuar është tërësisht i konfirmuar./kapitali/© SYRI.net
