Rama: Shqipëria mundësi për biznes për këdo që investon kursimet nga emigracioni

Historia e një familje të kthyer nga emigracioni dhe që ka ngritur biznesin e vetë familjar në Shqipëri, ishte në fokus të podkastit “Flasim” të kryeministrit Edi Rama.

“Kurrë më në emigracion” titullohej episodi i 13-të i sezonit 3 të Podkastit “Flasim”, ku të ftuar të kryeministrit Rama ishin Etleva dhe Aldo, nënë e bir, që treguan eksperiencën e tyre në emigracion dhe arsyet e vendimit për t’u kthyer dhe investuar në Shqipëri.

Ata treguan sfidat që ndeshën gjatë këtij rrugëtimi që nisi në Kutalli të Beratit, ku hapën pastiçerinë e parë në Shqipëri dhe vështirësitë që krijoi për ta situata e pandemisë ku gjithçka u mbyll, dhe praktikisht biznesi i tyre falimentoi.

Etleva tregon se gjithsesi vendimi për të mos u kthyer më në emigracion ishte marrë tashmë dhe pavarësisht dështimit të nismës në vendlindjen e tyre, Kutalli, ata vendosën që të provojnë sërish duke investuar në Tiranë, ku kanë ngritur edhe pastiçerinë e tyre, një biznes që rezultoi i suksesshëm.

Sipas Etlevës, ndryshimet që kanë ndodhur në Shqipëri ishin shtysa kryesore e vendimit të tyre për t’u kthyer dhe investuar këtu.

“Kam qenë para pak ditësh në Berat dhe atje ishte bërë gjithçka shumë bukur. Dua të jap një ‘bravo’ të madhe “, u shpreh ajo.

Kryeministri u shpreh se ka ndihmuar sa ka mundur për transformimin e Beratit.

“Kur nuk ishim në qeveri më dukej një gjë e pabesueshme që ne të kishim thesare si Berati ose Gjirokastra dhe ishin ashtu si ishte. Në Berat nuk shkoje dot se nuk kishte rrugë”, u shpreh Rama.

Lehtësitë që ka krijuar qeveria me reduktimin e taksave për biznesin e vogël, sipas tyre, e bënë shumë të favorshme investimin në Shqipëri.

“Unë e kam thënë, por nuk ma beson njeri, thonë bën propagandë. Kjo është një fazë e Shqipërisë që kush ka pak guxim të investojë kursimet e emigracionit bën ‘bingo’ këtu dhe jo vetëm në Tiranë, por kudo. Kudo Shqipëria ka oportunitet për të bërë biznes me investime jo të mëdha. Si në rastin e agroturizmeve”, u shpreh Rama. /ATSH