Një nga arsyet kryesore për popullaritetin e kremrave kundër diellit me spray është lehtësia e tyre e madhe. Këto spërkatje mund të aplikohen shpejt dhe në zona të vështira për t’u arritur. Kjo lehtësi e përdorimit është veçanërisht e dobishme për prindërit që përpiqen të mbrojnë fëmijët ose në përgjithësi njerëzit që janë vazhdimisht në lëvizje nën diell. A na mbajnë aq të sigurt nën rrezet UV?
Një disavantazh i madh i kremrave kundër diellit me spërkatje është potenciali për aplikim jokonsistent. Mund të jetë e vështirë për të vlerësuar nëse produkti është aplikuar mjaftueshëm dhe përdoruesit mund të lënë zona të pambrojtura. Fatkeqësisht, kremrat kundër diellit me spërkatje paraqesin gjithashtu një rrezik thithjeje, i cili mund të jetë i dëmshëm, veçanërisht për fëmijët dhe njerëzit me probleme të frymëmarrjes.
Akademia Amerikane e Dermatologjisë këshillon që të mos spërkatni krem kundër diellit direkt në fytyrë për të shmangur thithjen e kimikateve potencialisht të dëmshme. Në vend të kësaj, ata rekomandojnë ta spërkatni fillimisht në duart tuaja dhe më pas ta aplikoni në fytyrë. Duket se ka edhe shqetësime mjedisore lidhur me spërkatjet me krem kundër diellit.
Lëndët shtytëse të përdorura në spërkatjet me aerosol mund të kontribuojnë në ndotjen e ajrit dhe varfërimin e ozonit. Përveç kësaj, spërkatja e tepërt mund të shpërndahet në mjedis, duke ndikuar potencialisht në jetën detare dhe ekosistemet aty pranë, veçanërisht kur përdoret në plazh. Sekreti për të arritur mbrojtjen e kërkuar nga dielli dhe për të shmangur efektet anësore të pakëndshme në lëkurën tuaj dhe në rastin më të keq, kanceri i lëkurës, nuk është gjë tjetër veçse të merrni parasysh sasinë e kremit kundër diellit që aplikoni në baza ditore dhe sa shpesh e rifreskoni.
Përdorimi i kremit kundër diellit është po aq i rëndësishëm në dimër sa edhe në verë dhe rezultatet e aplikimit korrekt dhe të rregullt të tij shihen në afat të gjatë kohor. Edhe pse rëndësia e përdorimit të tij në ditët e sotme dihet, shumë pak e dinë se sa është sasia e rekomanduar e aplikimit të tij, në mënyrë që mbrojtja e lëkurës nga rrezet UVA dhe UVB të diellit të jetë e mjaftueshme./OraNews
