Selin Bollati dhe DJ Gimbo e kalojnë lidhjen në një tjetër nivel: Thjesht ndodhi!
Selin Bollati dhe DJ Gimbo kanë hedhur një tjetër hap në marrëdhënien e tyre, duke nisur bashkëjetesën në Tiranë. Fituesja e edicionit të pestë të “Big Brother VIP Albania” ka folur për këtë fazë të re të jetës private, duke treguar se vendimi për të jetuar së bashku nuk ishte planifikuar paraprakisht, por erdhi krejt natyrshëm.
E ftuar në emisionin “Wake Up”, Selin ka ndarë me publikun mënyrën se si po e përjeton këtë ndryshim, duke pranuar se ndihet mirë dhe po e shijon kohën që kalon me partnerin e saj larg kamerave të reality show-t.
“Është një fazë që po e shijoj shumë. Ka ardhur në momentin e duhur dhe shumë natyrshëm. Nuk kemi thënë se një ditë do të bashkëjetojmë, por ashtu ndodhi”, është shprehur ajo.
Pra, ndryshe nga çiftet që e planifikojnë gjatë këtë hap, për Selinin dhe Gimbon gjërat duket se kanë rrjedhur pa presion dhe pa vendosur afate. Marrëdhënia e tyre ka vijuar të zhvillohet me ritmin e vet, duke i çuar drejt një përditshmërie të përbashkët.
Selin ka treguar gjithashtu se, pavarësisht angazhimeve të shumta profesionale dhe faktit që të dy kanë aktivitete të ndryshme, shtëpia mbetet vendi ku arrijnë të gjejnë kohë për njëri-tjetrin.
“Ne jemi në dy profile të kundërta, të angazhuar. Shtëpia është vendi ku na mbledh. Jemi okej, deri tani është shumë mirë”, ka deklaruar ish-banorja e BBVA-së.
Fjalët e saj tregojnë se çifti po përpiqet të gjejë ekuilibrin mes jetës profesionale dhe asaj personale, duke e konsideruar bashkëjetesën një mundësi për të kaluar më shumë kohë së bashku, pavarësisht impenjimeve.
Selin Bollati dhe DJ Gimbo u afruan gjatë eksperiencës së tyre në “Big Brother VIP Albania 5”, ku lidhja e tyre tërhoqi vëmendjen e publikut. Pas përfundimit të formatit, interesi për marrëdhënien e tyre ka vijuar, ndërsa çdo detaj i ri nga jeta në çift bëhet menjëherë objekt diskutimi mes fansave.
Këtë herë, Selin ka zgjedhur të tregojë se bashkëjetesa po ecën mirë dhe se nuk ka pasur nevojë për plane të mëdha apo vendime të sforcuara. Për të, duket se gjërat më të rëndësishme kanë ardhur në kohën e duhur, pikërisht atëherë kur marrëdhënia ishte gati për këtë hap të ri.
