“Asgjë nuk është më e dhimbshme sesa një brez që humbet shpresën”/ Inva Mula mbështet protestën e studentëve

Sopranoja shqiptare me famë ndërkombëtare, Inva Mula, ka reaguar përmes një mesazhi sensibilizues në një kohë kur të rinjtë po protestojnë në Tiranë dhe qytete të tjera të vendit.
Artistja ka vënë theksin te rëndësia e shpresës, besimit dhe dëgjimit të zërit të brezit të ri.
Në mesazhin e saj, Inva Mula shpreh shqetësimin për të ardhmen e të rinjve shqiptarë, duke theksuar se humbja e shpresës te brezi i ri është një nga dukuritë më të dhimbshme për shoqërinë.
Sopranoja nënvizon se të rinjtë duhet të kenë mundësinë të ëndërrojnë, të besojnë në të ardhmen e tyre dhe, mbi të gjitha, të dëgjohen.

“Asgjë nuk është më e dhimbshme sesa një brez i ri që humbet shpresën tek e ardhmja. Të rinjtë tanë meritojnë të ëndërrojnë, të besojnë dhe të dëgjohen, sepse në ato zëra rreh zemra dhe e ardhmja e Shqipërisë.”, shkruan Mula.
Mesazhi i artistes vjen në një periudhë protestash në Shqipëri, ku të rinj dhe studentë kanë dalë në rrugë për të shprehur pakënaqësitë e tyre dhe për të kërkuar ndryshime.
Pa iu referuar drejtpërdrejt kërkesave politike të protestuesve, Mula ka zgjedhur të përqendrohet te rëndësia që ka brezi i ri për të ardhmen e vendit.

Përmes fjalëve të saj, artistja përcjell nevojën për më shumë vëmendje ndaj aspiratave dhe shqetësimeve të të rinjve, duke e konsideruar zërin e tyre thelbësor për të ardhmen e Shqipërisë.

/Pamfleti