Artan Fuga ironizon krahasimet mes protestave me Evropën: Qeveria Rama po përsërit propagandën e Enver Hoxhës

Akademiku Artan Fuga ka kritikuar krahasimet mes protestave në Shqipëri dhe lëvizjeve studentore në Francë e vende të tjera evropiane, duke i cilësuar ato si përpjekje për të shtrembëruar realitetin dhe për të fshehur shkaqet e vërteta të revoltës.
Në një reagim në rrjetet sociale, Fuga sjell si shembull një episod të vitit 1968, kur Enver Hoxha vizitoi të rinjtë që punonin në aksionet për ndërtimin e hekurudhave në Gradishtë dhe i krahasoi përpjekjet e tyre me lëvizjet studentore që kishin shpërthyer në Francë.
Sipas akademikut, propaganda e regjimit komunist i paraqiste protestat evropiane si një revolucion proletar kundër kapitalizmit, ndërsa punën vullnetare të të rinjve shqiptarë si një kontribut për ndërtimin e socializmit. Fuga argumenton se ky interpretim nuk pasqyronte realitetin e asaj kohe dhe se krahasimi shërbente për të përcjellë një mesazh ideologjik.
“Kur dëgjoj, lexoj, shoh sesi barazojnë lëvizjet e protestave në Tiranë dhe gjetiu me lëvizjet studentore në Francë a gjetiu nëpër Evropë, buzëqesh hidhur”, shkruan Fuga, duke kundërshtuar atë që e konsideron një përpjekje për të paraqitur lëvizje të ndryshme si pjesë të së njëjtës kauzë.

Akademiku ndalet te dallimet mes protestave të vitit 1968 dhe situatës aktuale në Shqipëri. Sipas tij, studentët evropianë nuk synonin një revolucion socialist, ndërsa të rinjtë shqiptarë që angazhoheshin në aksionet e punës nuk po ndërtonin një shoqëri pa shfrytëzim, siç pretendonte propaganda e kohës.
“Në fakt, dy gënjeshtra bashkë. Rinia evropiane nuk po rrëzonte kapitalizmin dhe nuk po bënte revolucionin socialist, dhe vullnetarët në aksion nuk po ndërtonin shoqërinë pa shfrytëzim, por po shfrytëzoheshin kot më kot për punë skllavi të papaguar!”, shprehet ai.
Fuga e lidh këtë episod historik me debatin e sotëm për protestat në Shqipëri, duke kundërshtuar etiketimet që, sipas tij, përdoren për t’i barazuar ato me lëvizjet studentore në Evropë. Ai thekson se kërkesat e protestuesve shqiptarë burojnë nga shqetësime të ndryshme, përfshirë zemërimin ndaj korrupsionit dhe abuzimit me pushtetin.
Në reagimin e tij, akademiku kritikon gjithashtu rolin e propagandës dhe të komunikimit strategjik në krijimin e interpretimeve të deformuara të ngjarjeve politike e shoqërore. Sipas tij, përsëritja e krahasimeve të pasakta mund të shërbejë për të relativizuar arsyet e protestave dhe për të ndikuar në mënyrën se si ato perceptohen nga publiku.