“Ti linde me yll në ballë”/ Fjalimi prekës i motrës së Shpat Kasapit: Amanetin për Roelin do ta ruaj
Dhjetëra familjarë, miq dhe bashkëpunëtorë u mblodhën sot në Pallatin e Kulturës në Tetovë, për t’i dhënë lamtumirën e fundit artistit të dashur, Shpat Kasapit.
Ndër momentet më prekëse të ceremonisë ishte fjalimi i motrës së tij, Jehona Kasapi. E përlotur dhe e shtrënguar nga dhimbja, ajo vështirë gjente fjalët për të shprehur boshllëkun që ka lënë vdekja e vëllait.
“Sot me zemër të thyer jemi mbledhur për t’i dhënë lamtumirën e fundit vëllait tim, është shumë e vështirë për të përshkruar fjalët për të përshkruar dhimbjet që ndiej.
Shpat, shpirti i motrës, ti linde me yll në ballë, ishe një njeri i mirë, dije t’i ndieje hallet nga empatia jote e madhe. Ishe një njeri i mirë me zemër të bardhë dhe fisnik.
Shpati, ti i doje shumë fëmijët dhe pleqtë. Doje shumë të qeshësh, buzëqeshja ishte sinonim i yti. Është e rëndë të pranojmë se nuk do dëgjojmë zërin tënd, por ti do të mbetesh gjithmonë në zemrën. Ti do të mbetesh dritë në familjen tonë”, u shprehej ajo me lot në sy.
Motra e këngëtarit foli edhe për ndjeshmërinë e tij të veçantë ndaj njerëzve në nevojë, sidomos fëmijëve dhe të moshuarve, duke e cilësuar atë si një njeri që dinte të dëgjonte e të ndjente dhimbjen e të tjerëve.
Në fund, Jehona dha një premtim që emocionoi të gjithë të pranishmit: “Amanetin për Roelin do ta ruaj.”
Ceremonia u mbyll mes lotësh e duartrokitjesh të heshtura, ndërsa figura e Shpat Kasapit u përkujua me nderim dhe mirënjohje për gjithçka la pas.
