Studime të reja tregojnë se akullnajat e Marsit përbëhen nga mbi 80% ujë i pastër akulli dhe mbulohen vetëm me një shtresë të hollë pluhuri dhe guri. Për vite me radhë, shkencëtarët kishin menduar se këto struktura ishin kryesisht shkëmbinj me pak akull të përzier. Zbulimi i ri tregon se akullnajat në të gjithë planetin janë jashtëzakonisht të pastra, duke hapur dritare të re për të kuptuar klimën e kaluar dhe mundësitë për eksplorim të ardhshëm.
Në shpatet e maleve dhe brenda kratereve marsianë gjenden formacione që duken si rrjedha të bllokuara mjalti, të ngrira në vend. Këto janë akullnaja që lëvizin shumë ngadalë, pothuajse të padukshme me sy. Një ekip shkencëtarësh i udhëhequr nga Yuval Steinberg nga Instituti Weizmann në Izrael, së bashku me kolegët Oded Aharonson dhe Isaac Smith, zhvilluan një metodë të unifikuar për t’i studiuar ato. Ata përdorën matje me radarë për të përcaktuar raportin mes akullit dhe gurëve brenda akullnajave, diçka që nuk mund të shihet vetëm nga sipërfaqja.
Ekipi analizoi pesë vende të ndryshme në Mars duke përdorur instrumentin SHARAD të vendosur në sondën Mars Reconnaissance Orbiter. Rezultatet treguan se akullnajat në hemisfera të kundërta kanë thuajse të njëjtat veti. Sipas Smithit, kjo do të thotë se mekanizmat e formimit dhe ruajtjes kanë qenë të njëjtë kudo. Kjo nënkupton ose një periudhë të madhe akullnajash në të gjithë planetin, ose disa periudha të ndara, por me karakteristika të ngjashme.
Kuptimi i pastërtisë së këtyre akullnajave është i rëndësishëm për dy arsye kryesore. Së pari, na jep njohuri të reja mbi klimën e lashtë të Marsit dhe proceset që kanë formuar sipërfaqen e tij. Së dyti, ka rëndësi praktike për misionet e ardhshme njerëzore, pasi akulli mund të shërbejë si burim uji jetik për të pirë, për të prodhuar oksigjen ose karburant raketash.
Studimi thekson gjithashtu se nga programet hapësinore, si ato të NASA-s, nuk përfitojnë vetëm ShBA, por ndihmojnë edhe studentë e studiues në mbarë botën. Hapi tjetër për ekipin është të zgjerojnë kërkimet duke analizuar më shumë akullnaja në Mars, për të forcuar më tej këtë kuptim të ri mbi një nga burimet më të çmuara të planetit të kuq. /Scitech Daily – Syri.net
