Gabimi fatal që çoi në rrëzimin e Dreamliner-it të Air India/ U ndërpre furnizimi me karburant në motorë…
Një raport paraprak për aksidentin ajror të Air India-s, që i mori jetën 260 personave një muaj më parë, zbulon të dhëna të reja që ngrejnë edhe më shumë pikëpyetje dhe shqetësim.
Sipas raportit paraprak të Autoritetit për Hetimin e Aksidenteve Ajrore (AAIB), furnizimi me karburant drejt motorëve të avionit duket se u ndërpre disa minuta pas ngritjes, duke çuar në rrëzimin tragjik të tij.
Siç thuhet në raport, sipas Sky News, çelësat e furnizimit me karburant për të dy motorët u zhvendosën nga pozicioni i funksionimit (RUN) në pozicionin e ndërprerjes (CUTOFF) njëri pas tjetrit, brenda vetëm një sekonde. Si pasojë, rrotullimi i motorëve ra menjëherë, pasi ndaloi furnizimi me karburant.
Ky zhvillim shkaktoi konfuzion të madh në kabinën e pilotëve, siç dëshmohet nga regjistrimi audio i dialogëve në cockpit. Njëri prej pilotëve pyet tjetrin pse e ndërpreu furnizimin me karburant, për të marrë përgjigjen se nuk kishte qenë ai që e bëri këtë.
Pavarësisht përpjekjeve për të rindezur të paktën njërin motor, avioni nuk arriti të rifitonte fuqinë shtytëse të nevojshme dhe filloi të humbiste lartësi me një shpejtësi të pakthyeshme.
Vetëm disa minuta më vonë, avioni u rrëzua në një zonë të populluar, duke shkaktuar vdekjen e 241 pasagjerëve dhe 19 personave të tjerë në tokë. Përplasja dhe zjarri që pasoi dogjën automjete, shtëpi dhe gjithçka ndodhej rreth vendit të tragjedisë.
Raporti paraprak, i hartuar 30 ditë pas aksidentit, ende nuk jep përgjigje përfundimtare për mënyrën dhe arsyen pse u ndërpre furnizimi me karburant. Megjithatë, ai përbën hapin e parë në një hetim të gjatë, që synon të zbardhë rrethanat e sakta të kësaj tragjedie dhe të japë përgjigje për pyetjet e ashpra mbi mundësinë e një gabimi njerëzor apo teknik. Syri.net-Protothema
