Një histori shokuese u raportua nga “People”: misteri i vrasjes së një 26-vjeçareje nga Shtetet e Bashkuara u zbulua me ndihmën e qenit të saj.
Trupi i pa jetë i Mandy Rose Reynolds u gjet i djegur në prill të vitit 2023. Në fillim të nëntorit 2024, kushëriri i saj 29-vjeçar, Derek Daigneault, u dënua me burgim të përjetshëm për vrasjen e saj.
Por si ra policia gjurmët e tij?
Hetimi për krimin filloi menjëherë pas gjetjes së trupit më 5 prill. Pranë trupit të djegur, i cili nuk mund të identifikohej menjëherë, u gjet një qen i bardhë që “po lehte me tërbim ndaj oficerëve dhe refuzonte të largohej nga trupi,”sipas një deklarate për shtyp.
Ditën tjetër, u zbulua që qeni kishte një çip, nga i cili u zbulua se emri i tij ishte Titan dhe pronarja e tij ishte gruaja e djegur. Hetimet çuan policinë në shtëpinë e Reynolds, e cila ishte plotësisht bosh, madje edhe makina e viktimës mungonte.
Kur arritën ta gjenin makinën e saj, gjetën edhe vrasësin, Daigneault. Pasi ky i fundit pa policinë, u përpoq të ikte dhe të fshihej në një supermarket të afërt, por u arrestua. Brenda mjetit, ata gjetën gjithashtu një armë që përputhej me atë që ishte përdorur në krim.
Në një faqe për mbledhjen e ndihmave që u krijua pas vrasjes së saj, nëna e të ndjerës tha se e bija kishte lënë zonën ku jetonte, për t’u transferuar në një qytet tjetër dhe për të filluar studimet universitare. Kushëriri i saj kishte kërkuar adresën nga familjarët e të ndjerës. Më pas, ai shkoi në banesë dhe kreu krimin.
Deri tani, nuk janë bërë publike motivet e krimit./ANABEL
