Personat me arsim të lartë zakonisht kanë të ardhura më të larta, gjë që rrit kapacitetin e tyre për të shpenzuar dhe konsumuar më shumë produkte ose shërbime.
Niveli i arsimimit konsiderohet si një ndër faktorët kyç të zhvillimit të mirëqenies qoftë në aspektin individual apo edhe atë familjar. Këtë e reflektojnë edhe shifrat nga “Instituti i Statistikave” mbi shpenzimet sipas arsimit të kryefamiljarit. Sipas të dhënave, familjet të cilat kanë kryefamiljarin me arsim të lartë i kanë shpenzimet e konsumit më të larta se familjet me kryefamiljar arsimi i të cilit është 8/9 vjeçar apo i mesëm.
Por, nisur po nga të njejtat të dhëna, rezulton se edhe në vitin 2023, familjet që kishin kryefamiljar pa asnjë nivel arsimi shpenzuan më shumë se një vit më parë. Kjo tendencë është vënë re edhe në dy vitet e mëparshme.
Nga analiza e “Scan Intel” rezulton se niveli i shpenzimeve për konsum nga familjet në të cilat kryefamiljari ka arsim të lartë llogaritet në rreth 115 mijë lekë në muaj. Ndërkohë, në vitin 2023, familjet me kryfamiljarë me arsim 8-vjeçar shpenzuan 85,268 lekë në muaj, familjet me kryefamiljar me arsim të mesëm shpenzuan 96,176 lekë në muaj, ndërsa familjet me kryefamiljar pa asnjë nivel arsimi shpenzuar rreth 62 mijë lekë.
Nëse i referohemi analizës së ndryshimit vjetor për shpenzimet e këtyre familjeve shohim se rritjen më të madhe të shpenzimeve e kanë regjistruar familjet të cilat e kanë kryefamiljarin me arsim të mesëm, me 12.9%. Ndërkohë, familjet të cilët e kanë personin e referencës me arsim të lartë i kanë rritur shpenzimet me rreth 8%. Rënie të shpenzimeve me 0.2% kanë regjistruar familjet me arsim 8/9 vjeçar, ndërsa ato me asnjë nivel të përfunduar i rritën shpenzimet me 3.9%.
Por sa diferencë kanë në shpenzime këto familje me njëra tjetrën. Pra, sa vlen arsimi në vendin tonë. Nëse shohim diferencën mes shpenzimeve të një familje me arsim të lartë dhe atyre me kryefamiljar me arsim 8/9 vjeçar, të dhënat tregojnë se arrin në rreth 30 mijë lekë në muaj. Nga ana tjetër, diferenca mes arsimit të mesëm dhe të lartë vlerësohet në 19 mijë lekë. Ndërkohë, diferenca mes arsimit të mesëm dhe atij 8/9 vjeçar është rreth 10 mijë lekë./OraNews
