Industria gjermane e automobilave po lëkundet jashtëzakonisht – këtë gjë mund ta shihni edhe në Itali! Në shtëpinë e Ferrarit dhe Fiat, “Corriere della Sera”, gazeta më e madhe e përditshme në vend, jep alarmin dhe shton se po vjen “fundi për mitin e makinave gjermane”.
Në shkrim, autori analizon fushat problematike të industrisë gjermane të automobilave:
Çmimet e larta të energjisë: Pas sanksioneve kundër gazit rus (si rezultat i luftës së Rusisë kundër Ukrainës), kostot e energjisë u rritën ndjeshëm. Pa gaz të lirë, makinat janë bërë dukshëm më të shtrenjta për t’u prodhuar.
Vështirësitë në Kinë: Shitjet kanë rënë në tregun e rëndësishëm kinez – edhe pse makinat elektrike po lulëzojnë atje. Arsyeja është, ndër të tjera, politika proteksioniste e qeverisë kineze, që do të thotë se prodhuesve kinezë u jepet përparësi.
Italianët rendisin gabimet e bëra në Gjermani:
-Vonesat për elektrifikimin: Prodhuesit gjermanë të automobilave humbën tendencën drejt automjeteve elektrike dhe u vunë në lëvizje shumë vonë. Kina tani dominon tregun, veçanërisht kur bëhet fjalë për bateritë dhe softuerin. Prandaj, gjermanët po humbasin aksionet e tregut ndërkombëtar ndaj prodhuesve kinezë.
-Mbikapaciteti në fabrika: Kapacitetet prodhuese të fabrikave gjermane nuk mund të shfrytëzohen më për shkak të rënies së shifrave të shitjeve – përgjigja për këtë erdhi tepër vonë. Vitin e kaluar, nga një kapacitet total prej rreth gjashtë milionë veturash, vetëm rreth katër milionë u prodhuan në Gjermani.
Raporti nga Italia nxjerr një përfundim të mprehtë: problemet me të cilat përballen prodhuesit gjermanë të makinave nuk janë një çekuilibër i përkohshëm. Përkundrazi, ne po përballemi me probleme themelore strukturore në Gjermani!
Presidenti i Volkswagen, Arno Antlitz, deklaroi kohët e fundit se ata kishin ende “më së shumti dy vite për të ndryshuar situatën”. Pra nuk ka mbetur shumë kohë për të shpëtuar mitin e makinës gjermane!/TEMA
