“Arti dhe kultura nuk duhen parë si biznes…”/ Ledion Liço zbulon projektet e ardhshme të Top Channel Films!

Ledion Liço ka qenë i ftuar në episodin e radhës “Back to the Beginning” me Kozeta Kurtin, ku ka folur për fillimet e karrierës dhe jo vetëm

I ftuar në këtë episod të “Back to the Beginning” me Kozeta Kurti, ishte Ledion Liço, për të folur për fillimet e karrierës, drejtimin e Top Albania Radio-s, prezantimin e “Big Brother Vip” dhe themelimin e Top Channel Films.

Sa i përket kësaj të fundit, Ledioni tha:

Kjo marrëdhënia e fuqishme intensive që ti ke me ëndrrën që të krijohet dhe dëshira që ke për ta materializuar atë që ke kultivuar gjatë viteve, është një lloj realizmi i saj për të cilën ti ke punuar. Top Channel Films për mua ishte një realizim i diçkaje që nuk ka qenë në pjesën kryesore të ‘sirtarit të ëndrrave’, por në atë sirtar ka shumë hapësirë. Uroj të bëjmë gjëra të bukura, është e vështirë, por nëse do ishte e lehtë do e bënin të gjithë.

A do ishte po i njëjti filmi “Në Kuadër të Dashurisë” pa Luizin dhe Oltën?

Për mua arti dhe kultura nuk duhet kategorikisht të shihen si biznes. Mund të ishte më mirë, mund të ishte më keq, por në asnjë moment nuk është parë vetëm si biznes. Është një e mesme e artë. Jam i lumtur për mënyrën si shkoi, jam krenar që në një film munda të shikoj një nga idhujt e mi Ndriçim Xhepën për mua ai ka qenë një kujtim i pashlyer. Dëshira jonë është që të bëjmë gjithmonë edhe më shumë gjëra ambicioze. Po punojmë me diçka tani që është shumë ambicioze, por kjo është e bukura. Atë i sugjeroj të gjithëve, të përqafojnë të vështirën. Të përqafojnë më shumë jo-të sesa po-të, të duan njerëzit që i kritikojnë më shumë se ata që i vlerësojnë. Jam mirënjohës ndaj atyre që më kanë inkurajuar, por jam mirënjohës edhe më shumë ndaj atyre që më kanë kritikuar… /TAR/ Gazeta shqiptare