Terror në Nigeri/ Sulmohet ceremonia martesore, funerali dhe spitali, 18 të vrarë, 30 të plagosur

Të paktën 18 persona janë vrarë dhe 30 janë plagosur në një seri shpërthimesh vdekjeprurëse në shtetin verilindor të Nigerisë Borno, thonë zyrtarët.

Një nga sulmet e dyshuara me bombë raportohet të ketë vrarë gjashtë persona dhe plagosur të tjerë në një ceremoni martese të shtunën. Agjencia shtetërore e menaxhimit të emergjencave tha se kamikazët e dyshuar sulmuan një ceremoni martesore, funeral dhe spital në qytetin Gwoza.

Shteti Borno ka qenë në qendër të një kryengritjeje 15-vjeçare nga militantët islamikë të Boko Haram, e cila ka zhvendosur më shumë se dy milionë njerëz dhe ka vrarë më shumë se 40,000.

Boko Haram fitoi famë ndërkombëtare në vitin 2014 kur rrëmbeu më shumë se 270 nxënëse nga qyteti Chibok, gjithashtu në shtetin Borno.

Autoritetet thanë se 18 vdekje ishin konfirmuar të shtunën, një numër që përfshin fëmijë, të rritur dhe gra shtatzëna. Disa media lokale kanë raportuar një shifër shumë më të lartë – gazetat Vanguard dhe This Day të Nigerisë thanë se të paktën 30 ishin vrarë nga shpërthimet.

Sakaq, BBC raporton se një shtetrrethim është vendosur nga ushtria, ndërsa askush nuk ka marrë përgjegjësinë për sulmet. Gwoza u kap nga Boko Haram në vitin 2014 dhe u kthye nga forcat nigeriane në 2015, por grupi që atëherë ka vazhduar të kryejë sulme dhe rrëmbime pranë qytetit.

Nëntorin e kaluar, 20 persona u vranë nga kryengritësit e Boko Haram ndërsa po ktheheshin nga një shërbim funerali në shtetin fqinj Yobe. Sulmi ndodhi një ditë pasi militantët vranë 17 persona në një bastisje në fshatin Gurokayeya, pasi fshatarët refuzuan të paguanin të ashtuquajturën taksë të korrjes, tha policia/OraNews