Qeveria federale e Gjermanisë ka thirrur për konsultime në Berlin ambasadorin e saj në Moskë, Alexander Graf Lambsdorff, 57 vjeç.
Ky vendim u bë publik nga një zëdhënëse e Ministrisë së Punëve të Jashtme të hënën në Berlin.
Sipas saj, ky hap është marrë si përgjigje ndaj sulmit kibernetik të atribuuar Rusisë, i cili ka prekur ndër të tjera edhe Partinë Socialdemokrate (SPD).
Ambasadori pritet të qëndrojë në Berlin për një javë për këto konsultime, pas së cilës do të kthehet në Rusi.
Qeveria federale ka shprehur se merr shumë seriozisht këtë incident, i cili sipas zëdhënëses është vetëm njëri ndër disa ngjarje të ngjashme që kanë ndodhur gjatë muajve të fundit.
Qeveria gjermane akuzon grupin e hakerëve APT 28, të udhëhequr nga shërbimi i inteligjencës ushtarake ruse GRU, se kanë shfrytëzuar një dobësi të panjohur më parë në Microsoft Outlook të selisë së SPD-së që nga marsi i vitit 2022.
Kjo dobësi ka lejuar komprometimin kryesisht të llogarive të postës elektronike. Sipas zëdhënëses, kjo tregon një tendencë shqetësuese të rritjes së sulmeve kibernetike.
Këto sulme kibernetike nuk janë kufizuar vetëm tek partitë politike, por kanë synuar edhe institucione qeveritare dhe kompani në sektorë të ndryshëm si logjistika, mbrojtja, ajroro-hapësira dhe IT, duke përfshirë gjithashtu fondacione dhe shoqata.
Detaje të mëtejshme priten të publikohen së shpejti./OraNews
