IKMT shemb dy objekte në Orikum, pronarët: Ndërhyrja është e paligjshme, jemi ende në gjyq
Inspektorati Kombëtar i Mbrojtjes së Territorit (IKMT) ka ndërhyrë këtë të martë në Orikum, duke shembur dy objekte buzë bregdetit, të cilat, sipas autoriteteve, nuk ishin të kualifikuara për legalizim.
Nga ana e pronarëve, ky veprim konsiderohet i papranueshëm dhe i paligjshëm.
Ata pretendojnë se ndodhen ende në proces gjyqësor me Agjencinë Shtetërore të Kadastrës (ASHK) dhe nuk kanë marrë asnjë njoftim zyrtar për prishjen e objekteve
Pronari deklaroi se ka paraqitur të gjitha faktet dhe dokumentacionin që provon se çështja ndodhet në gjykatë, por përballë kanë gjetur një “fakt të kryer”.
Operacioni i shembjes u zhvillua me pjesëmarrjen e IMT-së së Vlorës, IKMT-së së Tiranës dhe forcave të shumta policore.
Pronari shprehet se ka kërkuar kohë për zgjidhjen e çështjes në mënyrë ligjore, por pavarësisht kundërshtimeve, IKMT ka vijuar aksionin, duke ngjallur pyetje për transparencën dhe respektimin e së drejtës së pronës private.
