Nga 0 në 100 km/h për 4 sekonda/ Erdogan “harron” politikën, prezanton makinën e re “Made in Turkey”
Industria automobilistike turke ka zgjeruar gamën e saj me modelin e ri elektrik Togg T10F, një sedan që i shtohet SUV-it T10X. Sipas mediave turke, dorëzimi i parë i këtij modeli iu bë presidentit Recep Tayyip Erdogan në Stamboll, ku ai kreu edhe një test-drejtim simbolik me automjetin blu të pajisur me stemën presidenciale.
T10F arrin deri në 435 kuaj fuqi dhe ofron autonomi nga 335 km deri në 610 km, ndërsa versioni me dy motorë përshpejton nga 0 në 100 km/h për vetëm 4,1 sekonda. Erdogan ka qenë një mbështetës i madh i projektit Togg, ndërsa ishte i pari që mori edhe SUV-in elektrik T10X në vitin 2023.
Sipas mediave turke, modeli i ri do të dalë në shitje më 15 shtator në Turqi dhe në fund të muajit pritet të nisë eksporti në Gjermani, me plane zgjerimi edhe në Francë e Itali.
