Qytetari denoncon: Makina në Tiranë, gjobën e vuri Rrugorja në Tepelenë! Policia e Gjirokastrës: Ishte me shpejtësi, kemi pamjet
Një qytetar ka denoncuar publikisht se i është vendosur një gjobë në mënyrë të paligjshme nga Rrugorja e Tepelenës, ndërsa makina e tij, sipas tij, ndodhej fizikisht në Tiranë në momentin e pretenduar të shkeljes.
“Po na vendosin gjoba pa qenë fare në ato vende”, shprehet qytetari, i cili u gjobit me 1000 lekë për shkelje në Tepelenë më 26 gusht 2025, ora 22:07. Nga verifikimi i të dhënave GPS, rezulton se automjeti ndodhej në kryeqytet.
Pas denoncimit, Policia Rrugore Gjirokastër reagoi duke sqaruar se radari automatik ishte instaluar më 26 gusht në aksin rrugor “Tepelenë-Krahës”, në vendin e quajtur “Lapidari”, Mogila. Sipas njoftimit, në orën 15:34 u konstatua një automjet tip “Volkswagen Tiguan” duke tejkaluar shpejtësinë e lejuar. Policia sqaroi se masa administrative u vendos bazuar në pamjet filmike të radarit dhe se drejtuesi i automjetit ka të drejtë të shohë pamjet në rast kontestimi.
Qytetari insiston se shkelja e regjistruar nuk i përket dhe pretendon se gjoba është e padrejtë, duke hapur debat mbi saktësinë e radarëve automatikë dhe sistemet e gjurmimit.
Reagimi i plotë i Policisë:
“Në lidhje me një postim të publikuar në rrjetet sociale, ku një shtetas pretendon se në datën 26.08.2025, në orën 22:07, i është vendosur masë administrative në qytetin e Tepelenë, ndërkoh automjeti i tij në këtë orë ndodhej në Tiranë, ju informojmë se:
Policia Rrugore Gjirokastër në vijim të kontrolleve intensive me dron dhe me radar, me qëllim sigurinë rrugore, më datën 26.08.2025, kanë instaluar radarin automatik në aksin rrugor “Tepelenë-Krahës” në vendin e quajtur “Lapidari”, Mogila, ku në orën 15:34, është konstatuar automjeti tip “Volkswagen Tiguan”, duke udhëtuar me shpejtësi tej normave të lejuara. Meqënëse radari është automatik, punonjësi i Policisë në përfundim të shërbimit, ka plotësuar masat administrative bazuar në pamjet filmike të regjistruara nga radari automatik. Drejtuesi i automjetit në rast kontestimi, Policia Rrugore do t’i vendosë në dispozicion pamjet filmike dhe orën e konstatimit.
Drejtoria Vendore e Policisë Gjirokastër falenderon qytetarët dhe median për denoncimet, si dhe fton që të vijojnë të denoncojnë në numrin 112, çdo rast të shkeljes së rregullave të qarkullimit rrugor, dhe i garanton ata se do të reagojë menjëherë, konform ligjit dhe me paanshmëri”.
