Në Zandvoort triumfon Piastri, Verstappen dhe Hadjar në podium, ‘KO’ për Norris, Leclerc dhe Hamilton
Fitore për McLaren dhe katastrofë për Ferrarin në rifillimin e Botërorit në Holandë pas pushimit veror. Nisur nga “pole position”, Oscar Piastri udhëhoqi garën gjatë gjithë kohës, duke përballuar rikthimin final të shokut të skuadrës Lando Norris, i cili, i kaluar nga Max Verstappen menjëherë pas startit, kishte rimarrë vendin e dytë, por u detyrua të tërhiqej në mënyrë dramatike shtatë xhiro para fundit për shkak të problemeve me motorin. Për Piastrin kjo është fitorja e nëntë në karrierë, një më shumë se Norris dhe Leclerc.
Në vendin e dytë u rendit Max Verstappen, që përsëriti rezultatin e vitit 2024, ndërsa podiumin e plotësoi një Isack Hadjar fantastik me makinën e VISA Cash App Racing Bulls. I nisur nga rreshti i dytë, debutuesi franko-algjerian zhvilloi një garë perfekte.
Ditë e zezë për Ferrarin, në prag të Çmimit të Madh të Italisë në Monza. Të dyja SF-25 e Maranellos dolën jashtë gare. Charles Leclerc u përplas në daljen e kthesës së tretë me Andrea Kimi Antonellin në xhiron e 54-t, pak sekonda pas daljes nga bokset. Piloti italian i Mercedesit u ndëshkua me dhjetë sekonda për shkaktimin e incidentit. Në të njëjtin vend më herët, Lewis Hamilton doli jashtë piste në xhiron e 23-të, duke goditur barrikadat për shkak të asfaltit të lagur nga shiu i ndërprerë.
Në të dy rastet, pista u neutralizua me Safety Car, që u rikthye edhe pas tërheqjes së Norris në fund. Top-pesëshen e mbyllën George Russell dhe Alexander Albon. Oliver Bearman përfundoi i gjashti, përpara dy Aston Martin-ëve të Lance Stroll dhe Fernando Alonso. Antonelli, pas penalizimit, u klasifikua vetëm në vendin e 16-të.
