Stetoskopi me inteligjencë artificiale që zbulon sëmundjet e zemrës për 15 sekonda
Mjekët kanë zhvilluar me sukses një stetoskop të drejtuar nga inteligjenca artificiale që mund të zbulojë tre sëmundje të zemrës për vetëm 15 sekonda. I shpikur në vitin 1816, stetoskopi tradicional ka qenë një pjesë thelbësore e punës së çdo mjeku për më shumë se dy shekuj.
Tani një ekip ka krijuar një version të përmirësuar me teknologji të avancuar dhe aftësi të Inteligjencës Artificiale, që mund të diagnostikojë dështimin e zemrës, sëmundjen e valvulave të zemrës dhe ritmet e parregullta të saj pothuajse menjëherë.
Stetoskopi i ri, i zhvilluar nga studiues në Imperial College London dhe Imperial College Healthcare NHS Trust, mund të analizojë ndryshime shumë të vogla në rrahjet e zemrës dhe qarkullimin e gjakut që veshi i njeriut nuk mund t’i dallojë, si dhe të kryejë një EKG të shpejtë në të njëjtën kohë. Detajet e këtij zbulimi, që mund të përmirësojë diagnostikimin e hershëm të këtyre tre gjendjeve, u prezantuan para mijëra mjekëve në kongresin vjetor të Shoqatës Evropiane të Kardiologjisë në Madrid, konferenca më e madhe në botë për zemrën.
Diagnostikimi i hershëm është jetik për dështimin e zemrës, sëmundjen e valvulave dhe ritmet e parregullta, duke mundësuar që ata që kanë nevojë për ilaçe shpëtuese të identifikohen më shpejt, përpara se të sëmuren rëndë.
Një studim që testoi stetoskopin me inteligjencë artificiale, me rreth 12 mijë pacientë nga 200 qendra mjekësore familjare në Mbretërinë e Bashkuar, u fokusua tek ata me simptoma si vështirësi në frymëmarrje ose lodhje.
Ata që u ekzaminuan me mjetin e ri kishin dyfish më shumë gjasa të diagnostikoheshin me dështim të zemrës, krahasuar me pacientë të ngjashëm që nuk u ekzaminuan me këtë teknologji.
Pacientët kishin tre herë më shumë gjasa të diagnostikoheshin me fibrilacion atrial, një ritëm i parregullt i zemrës që mund të rrisë rrezikun e goditjes në tru. Ata kishin pothuajse dyfish më shumë gjasa të diagnostikoheshin me sëmundje të valvulave të zemrës, ku një ose më shumë valvula nuk funksionojnë siç duhet.
‘Dizajni i stetoskopit ka mbetur i pandryshuar për 200 vjet, deri tani. Është e pabesueshme që një stetoskop inteligjent mund të përdoret për një ekzaminim 15-sekondësh, dhe më pas inteligjenca artificialetë japë shpejt një rezultat testi që tregon nëse dikush ka probleme me zemrën’, tha Dr Patrik Bächtiger, nga National Heart and Lung Institute në Imperial College London dhe Imperial College Healthcare NHS Trust.
Pajisja, e prodhuar nga kompania kaliforniane Eko Health, është afërsisht sa një letër bixhozi. Ajo vendoset mbi gjoksin e pacientit për të marrë një regjistrim EKG të sinjaleve elektrike nga zemra, ndërsa mikrofoni i saj regjistron qarkullimin e gjakut nëpër zemër.
Këto të dhëna dërgohen në ‘cloud’, një hapësirë e sigurt ruajtjeje online, për t’u analizuar nga algoritme të Inteligjencës Artificiale, që mund të zbulojnë probleme të zemrës që një njeri nuk do t’i dallonte.
Rezultati i testit, që tregon nëse pacienti duhet të shënohet si në rrezik për njërën nga tre gjendjet apo jo, dërgohet përsëri në një smartphone.
Ky zbulim mbart edhe një element rreziku, me një mundësi më të lartë që njerëzit të marrin gabimisht një paralajmërim se mund të kenë një nga këto gjendje kur në fakt nuk e kanë. Studiuesit theksuan se stetoskopi me Inteligjencë Artificiale duhet të përdoret për pacientë me simptoma të dyshuara të problemeve të zemrës, dhe jo për kontrolle rutinë tek njerëzit e shëndetshëm.
Megjithatë, ai mund të shpëtojë jetë dhe para duke diagnostikuar njerëzit shumë më herët.
‘Shumica e njerëzve me dështim të zemrës diagnostikohen vetëm kur mbërrijnë në urgjencë, në gjendje të rëndë. Ky studim tregon se stetoskopët me Inteligjencë Artificiale mund ta ndryshojnë këtë, duke u dhënë mjekëve të familjes një mjet të shpejtë e të thjeshtë për të zbuluar problemet më herët, në mënyrë që pacientët të marrin trajtimin e duhur më shpejt’, tha Dr Mihir Kelshiker, nga Imperial College.
‘Ky mjet mund të jetë një ndryshim i madh për pacientët, duke sjellë inovacionin drejtpërdrejt në duart e mjekëve të familjes. Stetoskopi me Inteligjencë Artificiale u jep klinicistëve lokalë aftësinë për të zbuluar problemet më herët, për të diagnostikuar pacientët në komunitet dhe për të adresuar disa nga vrasësit më të mëdhenj në shoqëri’, shtoi Prof Mike Lewis, drejtor shkencor për inovacion në NIHR.
