Iku pa na thënë asnjë fjalë’ – vajza e Naun Shundit rrëfen dhimbjen, Bujar Asqeriu: Humbëm një artist fisnik dhe të madh
Pas ndarjes nga jeta të aktorit, regjisorit dhe dramaturgut të njohur shqiptar Naun Shundi, mesazhet prekëse të familjarëve dhe kolegëve të tij të afërt kanë prekur opinionin publik.
Vajza e artistit, e tronditur nga humbja, tha se babai i saj iku në heshtje, pa pasur mundësinë t’i përshëndeste.
Edhe pse iku, la diçka –dhe ajo është ‘Zonja e Bujtinës’. La jetën për atë teatër,” – tha ajo ndër të tjera, duke treguar se ai ishte duke punuar për një shfaqje të re që nuk arriti ta përfundonte. “Babi po përgatitej për një shfaqje, por nuk e përfundoi. Mjekët nuk na e thanë dot që babi do të vdiste, askush nuk na e tha. Ai mendonte se do të jetonte. Iku pa na thënë asnjë fjalë. Babi e hëngri kanceri nga brenda.”
Një tjetër mesazh ngushëllimi dhe vlerësimi erdhi nga aktori i mirënjohur Bujar Asqeriu, i cili e cilësoi Shundin si një artist të kompletuar dhe njeri të rrallë.
Nauni ishte një artist universal – regjisor, aktor, dramaturg – por mbi të gjitha, një njeri i fisëm dhe modest. Ai nuk kërkoi kurrë vëmendje për veten, por vepra e tij fliste vetë. Rruga e tij në art duhet të jetë shembull për të rinjtë. La pas mesazhe paqeje, dashurie dhe përkushtimi për komunitetin artistik.”
Naun Shundi u nda nga jeta më 29 gusht, në moshën 66-vjeçare, pas një beteje të rëndë shëndetësore. Homazhet për artistin u mbajtën sot, nga ora 10:30 deri në 12:00, pranë ambienteve të Teatrit Kombëtar (ArTurbina) në Tiranë.
