Si një recetë makaronash ka shkaktuar një grindje diplomatike midis Mbretërisë së Bashkuar dhe Italisë

Një recetë e thjeshtë makaronash ka ndezur një debat të nxehtë mes Mbretërisë së Bashkuar dhe Italisë, duke marrë përmasa të një “mini-krize diplomatike”.

Faqja e njohur britanike e kulinarisë “Good Food” publikoi një version të pjatës tradicionale romake cacio e pepe, duke e përshkruar si një “drekë të shpejtë” me vetëm katër përbërës: spageti, piper, djathë parmixhano dhe gjalpë.

Për italianët, ky ishte një gabim i rëndë, pasi receta origjinale përmban vetëm tre përbërës: pasta (zakonisht tonnarelli), piper të zi dhe pecorino romano. Nuk ka vend për gjalpë apo parmixhano.

Sipas The Guardian, presidenti i degës së Romës dhe Lacios të shoqatës italiane të restoranteve Fiepet-Confesercenti, Claudio Pica, ka dërguar një ankesë zyrtare te kompania mediatike Immediate Media (që zotëron “Good Food”) dhe te ambasadori britanik në Romë, duke e quajtur recetën një “mistifikim absurd” të traditës italiane.

Pas reagimeve të ashpra, faqja britanike e ndryshoi recetën, duke rikthyer tre përbërësit origjinalë. Por, për të ndihmuar kuzhinierët amatorë, shtoi një këshillë që nëse salca nuk lidhet, mund të shtohet krem i dyfishtë, një sugjerim që shkaktoi zemërim të mëtejshëm në Itali.

Gazeta italiane Il Messaggero e përshkroi situatën me ironi, duke thënë: “Duke parafrazuar himnin britanik, tani në Romë thonë: ‘Zoti e shpëtoftë cacio e pepe’.”