Nga sezoni 2025/2026, Seria A do të përjetojë një revolucion në mënyrën e gjykimit të ndeshjeve. Pas testimeve të suksesshme në Kupën e Botës për Klube, janë zyrtarizuar disa rregulla të reja që synojnë transparencë më të madhe për tifozët dhe reduktim të humbjes së kohës në fushë.
Ndryshimi më i madh ka të bëjë me sistemin VAR: arbitrat do të kenë mundësinë të shpjegojnë vendimet e tyre me mikrofon të hapur, të dëgjueshëm nga publiku në stadium dhe nga ata që ndjekin ndeshjen në TV. Kështu, tifozët do të mund të kuptojnë menjëherë arsyet e një penalltie të dhënë apo jo, të një kartoni të kuq apo çdo vendimi tjetër të rëndësishëm pas konsultimit me VAR-in.
Po ashtu, do të ketë tolerancë zero ndaj humbjeve të qëllimshme të kohës, veçanërisht nga portierët. Nëse një portier mban topin për më shumë se tetë sekonda, arbitri do të akordojë goditje nga këndi në zonën më të afërt të vendndodhjes së portierit. Për t’ua lehtësuar situatën, arbitri do të sinjalizojë 5 sekondat e fundit me dorë të ngritur. Kartoni do të jepet vetëm në rast përsëritjeje të shkeljes.
Një tjetër ndryshim ka të bëjë me rolin e kapitenit, i cili do të jetë i vetmi lojtar me të drejtë për të komunikuar me gjyqtarin në mënyrë zyrtare. Gjithashtu, në rastin e një penalltie të realizuar me prekje të dyfishtë, ajo do të përsëritet.
Këto rregulla shënojnë një hap të rëndësishëm drejt transparencës dhe qartësisë në marrëdhëniet mes arbitrit, lojtarëve dhe tifozëve. Megjithatë, intervistat pas ndeshjes me arbitrat dhe përdorimi i kamerave në trup mbeten ende projekte për të ardhmen.
