Një ngjarje e rëndë është shënuar në Fier, ku në tokat e fshatit Sektor Seman është gjetur trupi i pajetë dhe i dekompozuar i një 72-vjeçari.
Policia njofton se viktima është identifikuar si shtetasi Mihallaq Shqepa, banues në Fier, i cili ishte shpallur në kërkim më datë 12 korrik 2025, pas një kallëzimi të bërë nga vëllai i tij për largim nga banesa.
Sipas informacioneve paraprake nga policia, në trupin e të ndjerit nuk janë konstatuar shenja dhune, ndërsa dyshohet se vdekja mund të ketë ndodhur për shkaqe natyrale, megjithëse do të jetë ekspertiza mjeko-ligjore ajo që do të përcaktojë përfundimisht shkakun.
Grupi hetimor po vijon punën për të zbardhur rrethanat e plota të ngjarjes dhe për të përcaktuar kohën dhe shkaqet e sakta të vdekjes së 72-vjeçarit.
Njoftimi i policisë:
Në tokat e fshatit Sektor Seman, është gjetur i dekompozuar, trupi i pajetë i shtetasit M. Sh., 72 vjeç, banues në Fier.
Nga kqyrja paraprake, nuk janë konstatuar shenja dhune.
Ky shtetas është shpallur në kërkim në datë 12.07.2025, nga Komisariati i Policisë Fier, pas kallëzimit të bërë nga vëllai i tij për largim nga banesa.
Grupi hetimor po punon për përcaktimin e shkakut të vdekjes.
