“Revoltuese që PS kandidon me drejtorin e Ujësjellësit kur nuk ka ujë”, Bardhi nga Mallakastra: Shpresa nuk ka humbur, PD do të investojë
Sekretari i Përgjithshëm i Partisë Demokratike, Gazment Bardhi, lider politik në Qarkun e Fierit, nga Kuta e Mallakastrës shprehet se është revoltuese që PS kandidon me drejtorin e Ujësjellësit, kur në zonë nuk ka ujë.
“Me kandidaten tonë, Silva Hasaj, ishim në Kutë, Mallakastër, një zonë me shumë burime, por e lënë pas dore për 12 vjet. Në Kutë, një fshat që mund të zhvillojë agroturizmin, nuk ka të rinj.
Banorët thonë se 90% e fshatit janë pensionistë, të tjerët janë larguar nga pamundësia për të ngritur një jetë të mirë aty. Në fakt, është kaq revoltuese që PS kandidon në zonë drejtorin e Ujësjellësit, kur në Kutë dhe në në fshatra të tjerë nuk ka ujë.
Por shpresa nuk ka humbur! Në Mallakastër, shumë banorë të saj do të votojnë për PD. Ne investuam për ta me rrugën kombëtare dhe dhjetëra rrugë fshatrash, ne do të investojmë sërish për të bërë Kutën dhe zona të tjera të Mallakastrës tërheqëse për turistët.
Ne duam që të rinjtë të kthehen në shtëpi, të punojnë këtu dhe të pasurohen në vendin e tyre. Agroturizmi është një mundësi e shkëlqyer dhe me lehtësitë fiskale, mbështetjen financiare që ne do të sigurojmë për këdo që investon në këtë fushë, do t’i japim jetë Kutës dhe fshatrave të tjerë te Mallakastrës!” – shprehet Bardhi.
(BalkanWeb)
