“Po ia dalim shumë mirë…”/ Pas marrëveshjes, Trump jep LAJMIN: Ja kur do vizitojë Zelensky SHBA-në
Presidenti amerikan sugjeron gjithashtu se një marrëveshje armëpushimi është afër
Presidenti amerikan, Donald Trump ka konfirmuar se presidenti ukrainas, Volodymyr Zelensky, do të vizitojë Shtëpinë e Bardhë të premten, më 28 shkurt.
Presidenti amerikan e konfirmoi lajmin gjatë fjalës së tij në mbledhjen e kabinetit. Ai tha se presidenti ukrainas do të udhëtojë drejt SHBA për të nënshkruar një marrëveshje për burimet natyrore dhe rindërtimin e Ukrainës së shkatërruar nga lufta, shkruan BBC
“Po ia dalim shumë mirë me Rusi-Ukrainë. Presidenti Zelensky do të vijë të premten. Tani është konfirmuar dhe ne do të nënshkruajmë një marrëveshje. Ne kemi qenë në gjendje të bëjmë një marrëveshje ku do të kthejmë paratë tona dhe do të marrim shumë para në të ardhmen, dhe mendoj se kjo është e përshtatshme,” tha Trump.
Trump tha se administrata e tij është e lumtur për marrëveshjen, e cila mund t’i japë SHBA-së akses në mineralet e rralla të Ukrainës, si pjesë e negociatave më të gjera për t’i dhënë fund pushtimit të Rusisë, si dhe përfshirjen e SHBA-së në një fond rindërtimi për Ukrainën.
Trump thotë se taksapaguesit amerikanë nuk duhet ta paguajnë faturën për Ukrainën më shumë sesa paguajnë evropianët. Presidenti amerikan sugjeron gjithashtu se një marrëveshje armëpushimi është afër, duke thënë: “Ne do të bëjmë një marrëveshje me Rusinë dhe Ukrainën për të ndaluar vrasjen e njerëzve”.
Trump e quan këtë një gjë shumë të rëndësishme dhe një arritje të madhe dhe u thotë gazetarëve në sallë se ekipi i tij do t’i këshillojë ata për përparimin.
