Këngëtari i njohur italian Albano Carrisi, i njohur me emrin e tij të skenës Al Bano, tha se është ftuar të performojë në një koncert që do të mbahet diku nga fundi i gushtit, ose në fillim të shtatorit në sheshin e Kuq të Moskës. Sipas tij, ky koncert do të mbahet për të festuar fundin e luftës në Ukrainë.
Në një intervistë për radion shtetërore italiane “Radio Rai 1”, Al Bano, një nga këngëtarët italianë më të famshëm në Rusi, i cili është takuar me presidentin rus Vladimir Putin në disa raste, zbuloi më shumë detaje. Italiani tha se ishte kontaktuar disa ditë më parë nga agjenti i tij në Moskë, i cili i tha të përgatitej për të performuar në një koncert madhor për të festuar fundin e luftës, e cila po i afrohet 3-vjetorit të saj.
“Një ditë më parë mora një mesazh nga një agjent rus. Ky është i njëjti menaxher që më prezantoi me Putinin dhe gjithë stafin e tij. Më shkroi: “Al Bano, bëhu gati, se nga fundi i gushtit, ose në fillim të shtatorit, do të mbajmë një koncert në Sheshin e Kuq, koncertin e famshëm për paqen”. Dhe kjo do të ndodhë. Jam absolutisht i bindur se do të ndodhë,”- tha Al Bano.
I pyetur nëse ishte gati për të performuar, ai u përgjigj: Si gjithmonë.
Al Bano nuk donte të përmendte me emër menaxherin dhe mediat perëndimore, si britanikja ” The Guardian”, nuk ishin në gjendje të verifikonin në mënyrë të pavarur këtë pretendim të këngëtarit./Pamfleti
