Gjeniu i gjeografisë dhe historisë mahniti publikun në “Albania’s Got Talent”, Cylaku: Çfarë më tha mësuesja kujdestare pas performancës
Talente në shumë fusha të artit kanë mahnitur anëtarët e jurisë së “Albania’s Got Talent” dhe publikun që prej të hënës së 11 nëntorit, ku spektakli i preferuar dhe i munguar i shqiptarëve hapi siparin në Vizion Plus.
Veç performancave në këndim, aktrim, kërcim në “Albania’s Got Talent” mori vëmendjen edhe Darien Cylaku, gjeniu i historisë dhe gjeografisë.
11 vjeçari arriti të merrte 4 “PO” nga juria. Ai arriti të jepte përgjigjet e duhura për pyetjet e vështira nga moderatori Isli Islami dhe anëtari i jurisë Kastro Zizo.
I ftuar në “Vizion i Pasdites”, konkurenti Darien Cylaku rrëfeu emocionet pas performancës mahnitëse në spektakël.
11-vjeçari shprehet se për të pyetjet ishin shumë të thjeshta. Cylaku tha se ka nisur të mësojë më shumë rreth kryeqyteteve, flamujve e çdo gjë që lidhet me gjeografinë dhe historinë që prej moshës 6-vjeçare.
Ai u shpreh se mësuesja kujdestare e shtyu të merrte pjesë në “Albania’s Got Talent”, teksa shtoi se ajo është ndjerë shumë krenare pasi ka parë performancën.
Cylaku: Kur njerëzit më shohin në rrugë më thonë: Ua, ky çuni nga Albania’s Got Talent! Flamujt, kryeqytetet nisa t’i mësoja nga enciklopeditë. Fillova t’i vizatoja ata që ishin më të thjeshtët dhe i memorizova. Pastaj fillova me hartat. Nisa të mësoja në formë loje që në moshën 6-vjeçare. Kur kisha kohë të lirë, e kaloja duke parë flamujt. Nëna më thoshte: Mos rri në telefon, çfarë shikon ashtu? Sepse unë i dëgjoja në anglisht dhe nëna nuk dinte çfarë shihja.
Në shkollë jam një nxënës shumë i mirë. Mësuesja ime kujdestare na ka thënë që të ikja të provoja veten, talentin tim, në Albania’s Got Talent. Kam pasur shumë ftohtë nga emocionet, por kur dola në skenë, emocionet u zhdukën. Kur hyra në skenë, më dhanë pyetje të lehta, nuk pata të vështira. Nuk kisha fare frikë. U përgatita te kryeqytetet, por unë nuk mësoj thjesht, i përsëris. I kam mësuar më parë.
Shumica e mësuesve u surprizuan. Mësuesja e gjeografisë më tha: Bravo, suksese! Prisja xhelozi nga shokët e klasës, por nuk ndodhi kështu. Ata më uruan. Ata e dinin dhe madje ishin të interesuar që të mësonin edhe ata.
“Albania’S Got Talent” është spektakli i të gjithë shqiptarëve që e gjeni çdo të hënë LIVE në orën 21:00 në televizion Kombëtar Vizion Plus, në Youtoube si dhe në të gjitha rrjetet sociale të Vizion Plus.
