Ky ndryshim vjen pas 102 vitesh dhe pas një periudhe të gjatë me automjete me motorë me djegie të brendshme.
Prodhuesi i makinave luksoze Jaguar ka ndryshuar logon e famshme, si pjesë e një strategjie të re që thekson kalimin e markës në një “epokë të re” dhe orientimin e saj drejt prodhimit të automjeteve elektrike. Ky ndryshim vjen pas 102 vitesh histori dhe pas një periudhe të gjatë me automjete me motorë me djegie të brendshme. Logoja e re ka për qëllim të përfaqësojë një modernizim të markës.
Logoja e re ka shkronjat e fjalës “Jaguar” të shkruara me shkronja të vogla, përveç “G” dhe “U” që janë të shkruara me shkronja të mëdha. Ky dizajn synon të krijojë një harmoni vizuale të papritur duke përzier shkronja të mëdha dhe të vogla, duke përdorur një font të personalizuar që shpreh modernizëm.
Ky ndryshim është pjesë e një strategjie më të gjerë për t’u përshtatur me kërkesat e tregut modern dhe për të risjellë vlerat e dikurshme të Jaguar. Kompania ka vendosur të përqendrohet në prodhimin e makinave elektrike, me modelin e parë elektrik të planifikuar për prodhim në vitin 2026. Pavarësisht se aktualisht në SHBA është në treg vetëm F-Pace SUV, dhe po ashtu ka ndaluar shitjet në Britani, Jaguar synon të rifitojë prestigjin dhe të ofrojë produkte që janë të qëndrueshme dhe të përshtatshme për të ardhmen.
Gerry McGovern, kreu krijues i Jaguar Land Rover, shpjegoi se ky ndryshim është një rikthim te thelbi i markës, duke ruajtur vlerat tradicionale, por duke i përshtatur ato për një audiencë të re dhe bashkëkohore. Logoja e re dhe ndryshimet e tjera do të prezantohen më 2 dhjetor gjatë Miami Art Week, kur pritet të shfaqen automjetet e markës me këtë imazh të ri.
