Dëgjonte trokitje poshtë shtëpisë për javë të tëra, familja shtanget pas zbulimit të policisë

Një grua 93-vjeçare nga El Sereno i Los Angeles, ndjeu trokitje të çuditshme që vinin nga pjesa poshtë shtëpisë së saj. Fillimisht, familja mendoi se mund të ishin kafshë, por situata mori një kthesë befasuese kur u lajmërua policia.

Ricardo Silva, bashkëshorti i vajzës së të moshuarës, tregoi se zhurmat dëgjoheshin kryesisht natën dhe tingëllonin si trokitje.

“Zakonisht i anashkalonim, duke menduar se ishin kafshë poshtë shtëpisë. Por zhurmat u bënë shqetësuese,” tha ai.

Kur policia mbërriti për të hetuar, zbuluan një burrë të zhveshur, 27-vjeçarin Issac Betancourt, që fshihej në hapësirën e ngushtë nën shtëpi. Betancourt refuzoi të dilte, duke sfiduar edhe qentë dhe përpjekjet fillestare për ta nxjerrë. Pas disa orësh, policia përdori gaz lotsjellës dhe e arrestoi për hyrje pa leje.

Nuk është e qartë se sa kohë kishte kaluar ai poshtë shtëpisë, por familja dyshon se mund të ketë qenë aty prej rreth gjashtë muajsh, duke hyrë e dalë nga tri hapësira të ndryshme të ngushta. Këto hapësira janë rreth 60 cm të larta dhe shtrihen poshtë strukturës së gjithë shtëpisë.

Familja tani po merr masa për të siguruar hyrjet e hapësirave të ngushta, në mënyrë që incidente të tilla të mos përsëriten./OraNews