Fyerje raciste ndaj Yamal në “El Clasico”, i gjithë shteti spanjoll “çohet në këmbë”
Pas ndeshjes së “El Clasico” të zhvilluar të shtunën, më 26 tetor, në stadiumin Santiago Bernabeu, qeveria spanjolle, La Liga dhe Real Madrid kanë dënuar aktet raciste ndaj disa prej lojtarëve të Barcelonës. Mediat spanjolle raportuan se Lamine Yamal, 17-vjeçari i Barcelonës me origjinë nga Guinea Ekuatoriale dhe Maroku, ishte një nga lojtarët e sulmuar me fyerje raciste dhe ksenofobike gjatë ndeshjes. Barcelona mposhti Real Madridin me rezultat 4-0, dhe Yamal shënoi një nga golat.
Këshilli i Lartë i Sporteve (CSD) i Spanjës dënoi incidentin dhe njoftoi se do të mblidhej të hënën për të diskutuar çështjen. Komisioni i Shtetit kundër Dhunës, Racizmit, Ksenofobisë dhe Intolerancës në Sport do të bashkëpunojë me CSD-në, policinë, rojën civile, Federatën Spanjolle të Futbollit (RFEF), La Liga-n dhe Prokurorinë e Shtetit për të hetuar incidentin.
La Liga njoftoi se do të raportojë menjëherë fyerjet raciste dhe gjestet ofenduese ndaj lojtarëve të Barcelonës në Seksionin e Krimeve të Urrejtjes të Brigadës së Informacionit të Policisë Kombëtare dhe do të informojë Prokurorin Koordinues të Njësisë së Krimeve të Urrejtjes dhe Diskriminimit në Prokurorinë e Shtetit. Në deklaratën e saj, La Liga dënoi ashpër incidentet në Santiago Bernabeu dhe konfirmoi angazhimin për të luftuar çdo formë të racizmit dhe urrejtjes brenda dhe jashtë stadiumeve.
Real Madrid gjithashtu hapi një hetim për të identifikuar përgjegjësit dhe për të marrë masat e duhura. “Real Madrid dënon fuqimisht çdo lloj sjelljeje që përfshin racizëm, ksenofobi apo dhunë në futboll dhe sport,” tha klubi në një deklaratë, duke shprehur keqardhje për fyerjet e pak tifozëve në një nga këndet e stadiumit.
Ministrja e Migracionit të Spanjës, Elma Saiz, gjithashtu dënoi incidentin, duke deklaruar se “ne nuk do të lejojmë që agresionet, të cilat nuk i tolerojmë në hapësira të tjera, të normalizohen në sport.”
Federata Spanjolle e Futbollit (RFEF) theksoi politikën e saj të “zero tolerancës” ndaj abuzimeve raciste dhe dhunës në stadiume, duke e quajtur këtë fenomen një “plagë shoqërore.” RFEF premtoi bashkëpunim me të gjitha institucionet për t’i dhënë fund dhunës dhe ofendimeve në ambientet sportive/A2 CNN
