KËRCET PUSHKA NË MEMALIAJ/ Tre të vrarë dhe 1 i plagosur pranë bashkisë, zbulohet identiteti i viktimave dhe dyshimet e para

Një ngjarje e rëndë ka ndodhur mbrëmjen e sotme në Memaliaj.

Bëhet fjalë për një vrasje të trefishtë, ndërkaq janë mësuar identitetet e viktimave dhe dinamika e ngjarjes

Teksa qëndronin në ambientet e një lokali kanë mbetur të vrarë 3 persona dhe 1 i katërt ka mbetur i plagosur.

Viktimat janë identifikuar deri në këto momente si Shyqo Kalemi, Gledio Muka dhe M. Çela.

Ndërkohë trupat e pajetë ndodhen brenda lokalit pranë bashkisë ku dhe ndodhi vrasja. Në orët e para të mëngjesit ata janë çuar në morgun e spitalit.

Atentatoret pasi kanë qëlluar me automatik kallashnikov duke lënë të vdekur 3 personat janë larguar në drejtim të paditur.

Dyshimet e para janë se objektiv i atentatit ka qenë Sh.K, ndërsa dy viktimat e tjera janë kamarieri dhe një klient i lokalit. 

Vrasja lidhet me sagën e përplasjeve dhe eleminimeve të grupeve Sadikaj-Papa në Sarandë dhe Memaliaj.

Kjo pasi viktimat mësohet se janë familjarë të Andrea Kalemit, i njohur edhe si Tiku Kalemi. Personat që humbën jetën janë Shyqyri Kalemi, Marsel Çela dhe Bledar Muka, ndërsa i plagosur ka mbetur Artur Kalemi që ndodhet në spital.

Shyqyri Kalemi është babai i Andrea (Tiku Kalemi). Në janar, një atentat iu bë edhe vëllait të Kalemit, Zamir Kalemi, ndërkohë viktimë më herët e përplasjeve ishte edhe nipi.

NJOFTIMI I POLICISË

Memaliaj/Informacion paraprak 

Rreth orës 23:20, në lagjen nr. 3, Memaliaj, në lokalin e shtetasit K. K., në rrethana ende të paqarta janë vrarë me armë zjarri shtetasit Sh. K., 74 vjeç, M. C., 47 vjeç dhe G. M., 36 vjeç si dhe ka mbetur i plagosur shtetasi A. K., 57 vjeç, i cili është transportuar për në spital, për të marrë ndihmë mjekësore.

Shërbimet e Policisë, me marrjen e njoftimit, shkuan menjëherë në vendin e ngjarjes dhe kanë ngritur pika kontrolli në bashkëpunim me Drejtorinë Vendore të Policisë Fier, Berat, Vlorë. 

Në drejtim të Memaliajt janë nisur Forcat Speciale Renea, Forcat Kombëtare të Sigurisë si dhe drejtues të lartë të Drejtorisë së Përgjithshme të Policisë së Shtetit.

Nderkohë është ngritur një grup i posaçëm hetimor në drejtimin e Prokurorisë dhe me ekspertë të Departamentit të Policisë Kriminale ku vijojnë punën në vendngjarje për sqarimin e rrethanave të ngjarjes, identifikimin dhe kapjen e autorëve.

Nga veprimet e para hetimore dyshohet se autorët menjëherë pas ngjarjes janë larguar me shpejtësi në drejtim të Mallakastrës me një automjet të cilin dyshohet se e kanë djegur në fshatin Bejaj, Mallakastër.

Forcat Kombëtare të Sigurisë dhe Renea kanë shkuar në vendin ku po digjet automjeti, kanë rrethuar zonën dhe vijojnë kontrollin për kapjen e autorëve. /oranews.tv