Janë publikuar pamje të mijëra peshqve të ngordhur në luginën Bustillos në veri të Meksikës ku ujërat kanë pësuar një rënie të konsiderueshme të nivelit. Siç raportohet punonjësit e qytezës së Cuauhtémoc dhe vullnëtarë nisën punë për pastrimin e zonës teksa tremben se mbetjet e peshqve që kanë nisur të dekompozohen, mund të shkaktojnë sëmundje. Ndërsa zyrtarët thonin se niveli i ujit në lagunës së gjerë ka rënë me rreth 50%.
“Kur ulet niveli i ujit, ndotësit bëhen më te përqendruar dhe kjo dëmton speciet që jetojnë aty”, tha përfaqësuesja Irma de la Peña Meraz, duke shtuar se dhe uji i mbetur nuk është i cilësisë së mirë.
Shfaqja e peshqve të ngordhur kishte nisur prej disa ditësh dhe një erë e rëndë ndjehej në disa zona të liqenit të kthyer thuajse në një kënetë. Në të gjithë territorin e Meksikës raportohen mangësi të reshjeve dhe temperatura të larta, duke shkaktuar vështirësi që ndjehen dhe në qytete. Zyrtarët vendas thonë se sezoni i nxehtë ka nisur prej prillit dhe mund të vijojë deri në tetor, duke shkaktuar sëmundje dhe vdekje prej rritjes së temperaturës./albeu
