Përqafim babai, qëndrim Presidenti/ Biden “e dorëzon” tek drejtësia të birin që rrezikon burgun: Nuk e fal!
Presidenti Joe Biden i dha një përfaqim si baba para se ta linte të birin 54-vjeçar përballë drejtësisë që kërkon ta çojë në burg pas gjyqit që zbuloi jetën e errët mes drogës, alkoolit dhe armëve pa leje. Kreu i Shtëpisë së bardhë u zotua se do të respektojë vendimin, ndërsa më herët ka deklaruar se nuk do ta amnistojë nëse dënohet
Presidenti i SHBA, Joe Biden, përqafoi të birin, Hunter Biden, pasi një juri e shpalli fajtor në një proces që zbuloi jetën e tij mes drogës, alkoolit dhe armëve, dhe më pas e la në dorë të drejtësisë.
Kreu i Shtëpisë së Bardhë tha më pas se do të respektojë vendimin që mund ta çojë 54-vjeçarin në burg.
Unë jam president, por jam edhe baba. Jill dhe unë e duam djalin tonë dhe jemi shumë krenarë për njeriun që ai është sot”, tha kreu i Shtëpisë së Bardhë në një deklaratë.
Shtoi se ai do të “pranonte rezultatin e këtij rasti dhe… do të vazhdojë të respektojë procesin gjyqësor ndërsa Hunter do ta çojë çështjen në Apel.
Presidenti Biden më herët përjashtoi mundësinë e faljes së djalit të tij, që u bë fëmija i parë i një presidenti të SHBA në detyrë që përballet me ndjekje penale.
Një juri me 12 anëtarë e shpalli Hunter Biden fajtor se kishte gënjyer për përdorimin e tij të drogës në një formular gjatë blerjes së një pistolete në vitin 2018.
Presidenti nuk ishte në gjykatë, por shumë anëtarë të familjes përfshirë zonjën e parë, Jill Biden ishin në godinën e drejtësisë për ta mbështetur.
Procesi ndaj të birit erdhi në kohën kur Presidenti Biden bën fushatë për rizgjedhje në nëntor dhe më pak se dy javë pasi rivali i tij në zgjedhje, Donald Trump u dënua vetë për një krim në Nju Jork.
Vendimi shkaktoi reagime të menjëhershme politike, duke përfshirë edhe nga republikanët në Kongres, të cilët kanë kaluar vite duke hetuar sjelljen dhe lidhjet e biznesit të Hunter Biden.
Stafi i fushatës së Donald Trup në një reagim tha se gjyqi “nuk ishte asgjë më shumë se një shpërqendrim nga krimet e vërteta të Familjes së Krimeve Biden”.
Ish-presidenti e ka përdorur shpesh këtë përshkrim, duke iu referuar akuzave për sjellje të pahijshme të bëra kundër presidentit dhe djalit të tij nga republikanët.
Demokratët në Kongres akuzuan kolegët e tyre republikanë për hipokrizi dhe vlerësuan sistemin e drejtësisë amerikane.
Ndërkohë anëtarë të jurisë që shpallën fajtor djalin e presidentit thanë se politika nuk ishte factor në vendimin e tyre.
Hunter Biden rrezikon deri në 25 vjet burg, por ekspertët ligjorë thonë se ka shumë pak gjasa që dënimi përfundimtar të jetë kaq i lartë.
Në shtator, ai do të përballet me gjyqin në Kaliforni për akuzat se nuk ka paguar 1.4 milion dollarë në taksat mbi të ardhurat. Nëse shpallet fajtor në këtë rast, Hunter Biden mund të përballet me deri në 17 vjet burg./OraNews
