Gjenerali ukrainas: Fati i vendit tonë në rrezik, askush nuk mund të qëndrojë larg

Oleksandr Pavliuk, komandant i Forcave Tokësore të Ukrainës, u ka kërkuar ukrainasve të bashkohen me Forcat e Armatosura, pasi fati i vendit është në rrezik, që do të thotë se askush nuk mund të qëndrojë larg.

Këto komente Pavliuk i bëri në një postim në profilin e tij zyrtar në Facebook, transmeton Telegrafi.

“Sa më shumë ukrainas të gjejnë guximin për t’u bashkuar me radhët e Forcave të Armatosura, aq më pak shanse do të ketë Rusia për të zbatuar planet e saj gjakatare dhe aq më shpejt qytetet ukrainase do të rifillojnë jetën e tyre të zakonshme dhe të sigurt”, ka shkruar Pavliuk.

“Prandaj u bëj thirrje ukrainasve që të lënë pas emocionet dhe të mos i nënshtrohen provokimeve. Është e domosdoshme të kuptojmë se askush nuk mund të qëndrojë larg. Fati i vendit, fati i kombit tonë është në rrezik”, shtoi ai.

Pavliuk beson me vendosmëri se “Rusia nuk do të lërë askënd rehat: as ata që e kanë fshehur dhe as ata që e kanë tradhtuar Ukrainën”.

“Tani është një moment historik që fati na ka dhënë: ose do të mbrojmë dhe ruajmë shtetin, ose do të zhdukemi si komb! Mbështetni mbrojtësit me fjalë dhe me vepra. Bashkohuni në radhët e Forcave të Armatosura të Ukrainës. Ngrihuni në këmbë për familjen tuaj, shtëpinë, vendin dhe të ardhmen tuaj. Forca jonë është në unitet! Nuk ka zgjidhje tjetër”, theksoi gjenerali ukrainas.

Ai shtoi se Forcat e Armatosura të Ukrainës kanë nevojë për specialistë të ndryshëm: shoferë, nëpunës, kuzhinierë, ndërtues, specialistë IT, kontabilistë, mjekë dhe inxhinierë. /Telegrafi/