ZBULOHEN ISH-SIGURIMSAT/ Autoriteti i Dosjeve djeg edhe ata me certifikata pastërtie: Pak institucione bashkëpunojnë
Autoriteti i Dosjeve ka zbuluar bashkëpunëtorë të sigurimit të shtetit edhe mes atyre që në vitin 1998 morën certifikatë pastërtie. Janë të paktën 9 zyrtarë të lartë, apo parlamentarë që kanë figuruar në dokumente, por në raportin e dorëzuar në Kuvend thuhet se vetëm një institucion ka pranuar të vijojnë procedurat e rishikimit të dokumentit
Autoriteti i Dosjeve ka mundur të zbulojë bashkëpunëtorë të sigurimit të shtetit të regjimit komunist, edhe mes atyre që morën certifikatë pastërtie nga komisioni Mezini-Bezhani.
Sipas të dhënave, pas ndryshimeve të ligjit, nga 17 raste, 9 kanë rezultuar ose të kenë qenë dëshmitarë në gjyqet politike të kohës, ose kanë bashkëpunuar me sigurimin e kohës duke përndjekur ata që quheshin në atë kohë armiq të partisë ose kanë qenë prokuror apo gjyqtar në këto çështje
Fillimisht emrat e tyre dolën në dosjet e të dënuarve politikë, e më tej pas miratimeve ligjore u hap edhe dosja me pseudonimet që ata kanë pasur në atë kohë
Megjithatë nuk ka të dhëna se në cilin pozicion dhe nivel janë të angazhuar në administratën shtetërore apo në Kuvend, por shtohet se vetëm një nga institucionet ka reaguar duke kërkuar riverifikimin e certifikatës së pastërtisë.
Me dosje janë gjetur edhe emra të cilët janë propozuar për emërim, rritje në detyrë, apo dhënie të titujve të nderit në pushtetin vendor. Nga 61 bashki vetëm 10 prej tyre kanë kërkuar verifikimin e kandidatëve për dekorim. Në 61 materiale të përpunuara rezultojnë që 14 kanë pasur dosje.
Ndërsa nga administrata shtetërore janë verifikuar 257 persona ku 14 kanë qenë bashkëpunëtorë të Sigurimit të Shtetit./OraNews
